खेलो इंडिया यूथ गेम्समे 28 खेलक लेल 28 राज्य आ 8 केंद्र शासित प्रदेशसँ 8500 खिलाड़ी, 1500 प्रशिक्षक आ तकनीकी अधिकारी सब शामिल भऽ रहल छथि।
बिहारक पाँच शहर पटना, गया, राजगीर, भागलपुर, बेगूसरायमे एहि खेलक आयोजन होयत। मुख्यमंत्री नीतीश कुमार काल्हि रविकेँ पाटलिपुत्र खेल परिसर पहुँचलाह आ ओतए चलि रहल खेलो इंडिया यूथ गेम्स 2025 केर तैयारिक निरीक्षण कएलाह। मुख्यमंत्री नीतीश कुमार एहि संदर्भमे अधिकारी सभकेँ आवश्यक दिशा-निर्देश देलनि। ओ सेंट्रल कंट्रोल एंड कमांड सेंटर, कॉफ्रेंस हॉल, स्टेडियम, इंडोर स्टेडियम सहित अन्य भाग सभक जायजा लेलनि।
मुख्यमंत्री संग-संग उद्घाटन समारोहमे होबय बला कार्यक्रम सभ लेल खिलाड़ी आ कलाकार द्वारा कएल जा रहल अभ्यासक सेहो निरीक्षण कएलाह। ओ 4 मईकेँ उद्घाटन समारोहमे प्रदर्शित होयवाला विश्वक सबसँ पैघ मिथिला पेंटिंग केर निर्माणक अवलोकन कएलाह।
जनतब जे विश्वक सबसँ पैघ बनाओल गेल मिथिला पेंटिंगक लेल गिनीज वर्ल्ड रिकॉर्डक सर्टिफिकेट मुख्यमंत्रीकें सौंपल गेल अछि। मिथिला चित्रकला संस्थान, सौराठ, मधुबनीक 50 कलाकाऱ सभ कतेको समय तक विश्राम नहि कय एही पेंटिंगकेँ तैय्यार कएलनि। विश्वक सभसँ पैघ मिथिला पेंटिंग तैयार करबाक महत्वपूर्ण भूमिका निभेबाक लेल पद्मश्री बऊआ देवीकेँ मुख्यमंत्री द्वारा सम्मानित कएल गेल।
बिहारमे पहिल बेर खेलो इंडिया यूथ गेम्स 2025 केर आयोजन 4 मईसँ 15 मई तक भ’ रहल अछि। एकर उद्घाटन 4 मईकेँ प्रधानमंत्री नरेन्द्र मोदी करताह। खेलो इंडिया यूथ गेम्समे 28 खेल सभक लेल 28 राज्य आ 8 केंद्र शासित प्रदेशसँ 8500 खिलाड़ी, 1500 प्रशिक्षक आ तकनीकी अधिकारी शामिल भ’ रहल छथि। एहि अवसर पर मुख्यमंत्रीक प्रधान सचिव डॉ. एस. सिद्धार्थ, सचिव कुमार रवि, विशेष कार्य पदाधिकारी गोपाल सिंह, बिहार राज्य खेल प्राधिकरणक महानिदेशक सह मुख्य कार्यकारी अधिकारी रवीन्द्रण शंकरण सहित अन्य वरीय अधिकारी मौजूद छलाह।
