आम आदमी पार्टी (आप) सोमदिन अपन चुनाव अभियान शुरू कयलक। पार्टी अपन प्रमुख आ दिल्लीक मुख्यमंत्री अरविन्द केजरीवालकेँ चुनाव अभियानक केन्द्रमे रखलक अछि। आम आदमी पार्टीक चुनाव अभियानक नारा अछि ‘जेल का जवाब वोट से’।
दिल्लीक मुख्यमंत्री अरविन्द केजरीवाल कथित शराब घोटालाक मामिलामे जेलमे छथि। चुनाव अभियानक शुरुआत करैत आम आदमी पार्टी कहलक जे दिल्लीक जनता मुख्यमंत्री अरविन्द केजरीवालकेँ जेलमे भेजबासँ नाराज अछि। जवाब वोटक माध्यमसँ देल जाएत। आम आदमी पार्टीक सांसद संदीप पाठक कहलनि जे हम दिल्लीक जनतासँ आग्रह करैत छी जे मतदानक दिन जेलक जवाब वोटसँ दियौक।
आम आदमी पार्टी अपन चुनाव प्रचार पोस्टरक सामने सीएम अरविन्द केजरीवालेकेँ रखलक अछि। एहि पोस्टरमे दिल्लीक मुख्यमंत्री केजरीवालकेँ सलाखक पाछाँ देखाओल गेल अछि।
एहि दौरान आम आदमी पार्टी दिल्लीक संयोजक आ दिल्ली सरकारमे मंत्री गोपाल राय, राज्यसभा सांसद संदीप पाठक आ संजय सिंह सहित कतेको नेता उपस्थित छलाह।
संजय सिंह दिल्लीक मतदाता सभसँ अपील कयलनि अछि जे ओ वोट देबासँ पहिने केजरीवाल द्वारा मुफ्त कयल गेल बिजलीक बिलक जरुर देखथि। दिल्लीमे बनल नीक स्कूलकेँ देखू। वोट देबासँ पहिने दिल्लीक लोकक स्वास्थ्य सेवासँ जुड़ल मोहल्ला क्लीनिक देखू।
पार्टीक महासचिव संदीप पाठक कहलनि जे सभ दिल्लीवासी देखलनि अछि जे अरविन्द केजरीवाल कोना संघर्ष कयलनि। ओ दिल्लीवासीकेँ अपन परिवार मानैत छलाह आ प्रत्येक परिवारक प्रत्येक बच्चाक शिक्षाक नीक व्यवस्था कयलनि, बीमार लोकक लेल दवाईक व्यवस्था कयलनि, स्वास्थ्य प्रणालीकेँ बदलि देलनि। पहिने दिल्लीमे पानिक लेल पुकार छल। लेकिन, केजरीवाल पेयजल उपलब्ध करबा लेल नीक व्यवस्था कयलनि।
संगहिसंग आम आदमी पार्टीक कहब अछि जे दिल्ली सरकार बसमे महिलासभक लेल निःशुल्क यात्राक व्यवस्था कयलक अछि। अरविन्द केजरीवाल दिल्लीक लोकक सेवा कयलनि अछि।
