उत्तराखंडक रुद्रप्रयागक गौरीकुंड इलाकामे काल्हि एकटा पैघ दुर्घटना भेल। रविदिन भोरमे श्री केदारनाथ धामसँ केदारनाथ मार्ग पर गुप्तकाशी जा रहल एकटा हेलीकॉप्टर गौरीकुंड लग दुर्घटनाग्रस्त भऽ गेल। हेलीकॉप्टरमे कुल सात गोटे सवार छलाह। एहि दुखद दुर्घटनामे सात गोटेक मृत्यु भऽ गेल जाहिमे एकटा 23 महीना केर बच्चा सेहो शामिल अछि। एनडीआरएफ आ एसडीआरएफ केर टीम पहुंचल छल। आगिला आदेश धरि हेलीकॉप्टर सेवा बंद कय देल गेल अछि।
उत्तराखंड केर सीएम पुष्कर सिंह धामी केदारनाथ-गौरीकुंडक बीच हेलीकॉप्टर दुर्घटनाक बाद सीएम आवास केर वरिष्ठ अधिकारीक संग वर्चुअल उच्च स्तरीय बैसार कयलनि। उच्च स्तरीय बैसारमे राज्यक मुख्य सचिव, आपदा प्रबंधन सचिव, यूसीएडीएक सीईओ, गढ़वाल आयुक्त सहित अन्य वरिष्ठ अधिकारी मौजूद छलाह। दू दिन लेल हेली सेवा संचालन पर रोक लगा देल गेल अछि।
जनतब अनुसार, रविदिन भोरमे आर्यन कंपनीक हेलीकॉप्टर दुर्घटनाग्रस्त भऽ गेल। ई दुर्घटना गौरीकुंड क्षेत्रमे भेल अछि। बताओल जा रहल अछि जे ई घटना भोर साढ़े पाँच बजे भेल अछि। खराब मौसमकेँ हेलीकॉप्टर दुर्घटनाक कारण कहल जा रहल अछि।
हेलीकॉप्टरक नोडल अधिकारी राहुल चौबे आ जिला आपदा प्रबंधन अधिकारी नंदन सिंह राजवार हेलीकॉप्टरक दुर्घटनाक पुष्टि कयने छथि। गौरीकुंडक ऊपर घास काटैत नेपाली मूलक महिला हेलीकॉप्टर दुर्घटनाक सूचना देलनि।
एहि दुखद दुर्घटनामे सात गोटेक मृत्यु भऽ चुकल अछि। जाहिमे एकटा दंपति आ हुनक 23 महीनाक बच्चा सेहो शामिल अछि। जयसवाल परिवार महाराष्ट्रक बताओल जा रहल अछि। दू गोटे स्थानीय छथि विनोद नेगी आ विक्रम सिंह रावत। विक्रम सिंह रावत बीकेटीसीसी केर कर्मचारी छलाह।
