जेडीयू नेता केसी त्यागी नीतीश कुमारक बारेमे बड़का बयान देलनि अछि। ओ कहलनि कि, जे नेता नीतीश कुमारकेँ आईएनडी गठबंधनक राष्ट्रीय संयोजक बनयबासँ मना कऽ देने छलाह, ओ किछु दिन पहिने हुनका प्रधानमन्त्री पदक प्रस्ताव देने छलाह। केसी त्यागीक एहि बयान पर कांग्रेस केर तरफसँ प्रतिक्रिया आयल अछि।
कांग्रेस कार्य समितिक बैसारक बाद एकटा संवाददाता सम्मेलनमे जखन केसी वेणुगोपालसँ नीतीश कुमारक प्रस्तावसँ सम्बन्धित प्रश्न पूछल गेल तँ ओ कहलनि, “हमरा लग एहन कोनो जानकारी नहि अछि।”
केसी त्यागी दावा कयलनि जे नीतीश कुमारकेँ आईएनडी गठबंधनक नेता लोकनि प्रधानमन्त्री पदक प्रस्ताव देलनि, मुदा ओ एकरा अस्वीकार कऽ देलनि। जदयू नेता कहलनि जे इंडिया गठबंधनक नेता द्वारा नीतीश कुमारक संग दुर्व्यवहारक कारण ओ विपक्षसँ संबंध तोड़ि लेलनि। संगहि भाजपा जेडीयू केर सम्मान दऽ रहल अछि।
राजगक संसदीय दलक बैसारमे जदयू ई स्पष्ट रुपसँ कहलक अछि जे हुनकर पार्टी राजगक हिस्सा बनल रहत। एहि बेर भाजपाकेँ सरकार चलयबाक लेल टीडीपी आ जेडीयूक सहारा लेबय पड़ल अछि। जेडीयू लोकसभा चुनावमे १२ सीट जीतल अछि।
