जनता दल (यूनाइटेड)क राष्ट्रीय प्रवक्ता के.सी. त्यागी रविदिन अपन पदसँ इस्तीफा दऽ देलनि। ओ “व्यक्तिगत कारणसँ इस्तीफा देबाक बात कयने छथि। पार्टीक शीर्ष नेतृत्व द्वारा हुनक इस्तीफा स्वीकार कऽ लेल गेल अछि। पार्टीक राष्ट्रीय सचिव अफाक अहमद खान केसी त्यागीक इस्तीफाक घोषणा कयलनि आ राजीव रंजन प्रसादकेँ नव प्रवक्ताक रूपमे घोषित कयलनि। ओ कहलनि जे पार्टी अध्यक्ष नीतीश कुमारक निर्देशक बाद ई निर्णय लेल गेल अछि।
जदयू केर तरफसँ जारी चिट्ठीमे इस कहल गेल अछि, “बिहारक मुख्यमंत्री आ पार्टी अध्यक्ष नीतीश कुमार राजीव रंजन प्रसादकेँ पार्टीक नव राष्ट्रीय प्रवक्ता नियुक्त कयलनि अछि। पहिने ई पद के.सी. त्यागी सँभारि रहल छलथि, जे व्यक्तिगत कारणसँ पदसँ इस्तीफा दऽ देलनि।”
नीतीश कुमारक बहुत निकट मानय जायवाला के सी त्यागी बहुत दिन धरि पार्टीमे विभिन्न पदपर काज कयने छथि। ओ बहुधा कतेको समाचार चैनल पर जेडीयूक पक्ष रखैत देखल जाइत छलाह। जेडीयूक विभिन्न मुद्दा पर पार्टीक रुख केर स्पष्ट करबाक लेल हुनकर भूमिका उल्लेखनीय छल।
मुदा, ई कहल जा रहल अछि जे के.सी. त्यागी हालहिमे कतेको मुद्दा पर अपन रुख स्वतंत्र रखने छलाह, जाहिसँ कथित रूपसँ पार्टीकेँ शर्मिंदगी भेल छल।
जनतब जे सर्वोच्च न्यायालयक फैसलाक बाद एससी/एसटी आरक्षण मुद्दा आ इजरायल-फिलिस्तीन संघर्ष पर त्यागीक विचार पार्टीक आधिकारिक बयानसँ भिन्न छल। हुनकर रुख इंडिया गठबंधनक नेतासभ जकाँ छल। ओ कतेको बेर पार्टी नेतृत्व वा अन्य वरिष्ठ नेतासँ परामर्श कयने बिना बयान जारी कयने छलाह। एहिसँ पार्टीक भीतर असंतोष पसरि गेल छल।
