प्रधानमंत्री नरेन्द्र मोदी शुक्रदिन अहमदाबाद पहुंचलाह। जतय ओ सिविल अस्पताल गेलाह आ विमान दुर्घटनामे घायल लोकसँ भेंट कयलनि। जाहिमे एकमात्र बचि गेल विश्वास कुमार रमेश सेहो छलाह। पीएम मोदीक अध्यक्षतामे अहमदाबाद हवाई अड्डा पर शीर्ष अधिकारीक संग समीक्षा बैसार भेल।
करीब 8:30 बजे अहमदाबाद हवाई अड्डा पहुंचलाक बाद पीएम मोदी सीधा दुर्घटना स्थल पर गेलाह, जतय ओ करीब 20 मिनट तक निरीक्षण कयलनि। ओ राहत आ बचाव कार्यमे लागल अधिकारी आ राष्ट्रीय आपदा प्रतिक्रिया बल (एनडीआरएफ) केर टीमसँ विस्तृत जानकारी लेलनि। स्थानीय प्रशासन आ एनडीआरएफ टीम लगातार राहत आ बचाव कार्यमे लागल अछि। एहि दौरान गुजरातक मुख्यमंत्री भूपेंद्र पटेल, केंद्रीय नागरिक उड्डयन मंत्री राम मोहन नायडू आ राज्यक गृहमंत्री हर्ष संघवी सेहो प्रधानमंत्री मोदीक संग मौजूद छलाह।
प्रधानमंत्री नरेन्द्र मोदी पूर्व मुख्यमंत्री विजय रूपानी केर निधन पर हुनकर परिवारसँ भेंट कयलनि आ मोदी गुजरातक पूर्व मुख्यमंत्री विजय रूपानी केर निधन पर गहींर शोक व्यक्त कयलनि। पीएम मोदी सोशल मीडिया प्लेटफॉर्म एक्स पर एकटा भावुक संदेश साझा करैत विजयभाई संग अपन नमहर समयसँ संबंध आ हुनकर योगदानकेँ याद कयलनि।
ओ एक्स पोस्ट पर लिखलनि, “मुख्यमंत्री विजयभाई गुजरात लेल बहुत काज कयने छथि। हम बहुत समय संग छलौंह। ओ एहेन बहुत रास कदम उठेलनि, जाहिसँ गुजरातक विकास दरमे तेजी आयल। जखनि ओ गुजरातक मुख्यमंत्री छलाह तखनि ओ गुजरातक विकास यात्राकेँ आगू बढ़ेबा लेल कतेको डेग उठेलनि, जाहिमे ‘जीवनमे सहजता’ एकटा उल्लेखनीय कदम अछि। हुनका संग भेल बैसार आ चर्चा सदिखन याद रहत।” दिवंगत आत्माक शांति, एहि शोक घड़ीमे हुनक परिवार आ मित्र लोकनिक संग छी।”
केंद्रीय गृहमंत्री अमित शाह बृहस्पतिकेँ मौका पर पहुंचल छलाह आ स्थितिक जायजा लेने छलाह। ओ गुजरातक मुख्यमंत्री भूपेंद्र पटेल आ अहमदाबाद पुलिस आयुक्तकेँ संग तालमेल बना कय राहत कार्यमे तेजी लाबयक निर्देश देलनि।
