‘ऑपरेशन सिंदूर’ केर बाद भारतक सीमावर्ती क्षेत्रमे सुरक्षा व्यवस्था अलर्ट मोड पर अछि। एहि बीच, पाकिस्तानक सीमासँ सटल राज्यमे आइ बृहस्पतिकेँ मॉक ड्रिल करबाक निर्णय लेल गेल अछि। जनतब अछि जे ई मॉक ड्रिल सीमावर्ती क्षेत्रमे आई सांझकेँ होएत।
सूत्रक अनुसार, पाकिस्तानसँ सटल जाहि भारतीय राज्यमे मॉक ड्रिल करबाक अछि, ओहिमे गुजरात, राजस्थान, जम्मू-कश्मीर आ पंजाब शामिल अछि। एतय आई मॉक ड्रिलक आयोजन कयल जायत आ एहि दौरान लोककेँ सतर्क रहबाक हिदायत देल जायत। ई मॉक ड्रिल एहेन समयमे भऽ रहल अछि, जखनि बीतल दिनमे भारत आ पाकिस्तानक बीच सीजफायरक घोषणा कयल गेल छल।
22 अप्रैलक पहलगाममे भेल आतंकवादी हमलाक बाद भारत पाकिस्तान आ पीओके स्थित 9 आतंकवादी ठिकानाकें नष्ट कए देलक। जवाबी कार्यवाहीमे पाकिस्तानी सेना भारतीय इलाकामे ड्रोन हमला कएलक, जाहिमे 300 सँ 400 ड्रोन पठाओल गेल। हालाँकि, भारतीय वायु रक्षा प्रणाली एहि ड्रोन्सकेँ प्रभावी ढंगसँ निष्क्रिय कए देलक। ई हमला जम्मू-कश्मीर, राजस्थान आ पंजाबक किछु सीमावर्ती इलाकामे निशाना बना कय कएल गेल छल। ड्रोन आ मिसाइलसँ कएल गेल हमलाक प्रयासक कारण जम्मू-कश्मीर, पंजाब आ राजस्थानक किछु इलाकामे ब्लैकआउट आ सायरन बाजय लागल। ओकर बाद भारतक जवाबी कार्यवाहीसँ पाकिस्तानमे अफरा-तफरी मचि गेल। दुनू देशक सैन्य अधिकारी सभक बातचीत स्तर पर पाकिस्तानक दिसिसँ संघर्ष विरामक शुरुआत कएल गेल, जकरा बाद सीजफायरक घोषणा कएल गेल।
बादमे पाकिस्तानी पीएम शहबाज शरीफ सेहो नूर खान एयरबेस पर भारतक हमला केर बात स्वीकार कएलनि। शरीफ ई बयान “यौम-ए-तशाकुर” (धन्यवाद) नामक भव्य समारोहमे अपन भाषणक दौरान देलनि। शरीफ कहलनि, “9 आ 10 मईकेँ राति करीब 2:30 बजे सेना प्रमुख हमरा फोन कएलनि आ कहलनि कि भारत अपन बैलिस्टिक मिसाइल सभक द्वारा हमरा पर हमला कएलक अछि। एकटा मिसाइल नूर खान एयरबेस पर खसल आ किछु अन्य मिसाइल अन्य इलाकामे खसल अछि।”
