‘कर्ण समागम 2025, बैंगलोर’ कर्ण संस्कृति आ टेक स्टार्टअप पर समुच्चय परिचर्चा संग भेल सफल आयोजन
‘कर्ण समागम 2025, बैंगलोर’ कर्ण संस्कृति आ टेक स्टार्टअप पर समुच्चय परिचर्चा संग भेल सफल आयोजन
*
बैंगलोर समदिया 
!! कर्णगोष्ठी केर ‘केकेएम – द पावर ऑफ कर्ण कायस्थ, कर्नाटक इकाई’ द्वारा आयोजित ‘कर्ण समागम 2025’ बैंगलोरमे पारिवारिक स्नेह, परंपरा-संस्कृति आ ज्ञानवर्धनक परिचर्चाक संग ११ अक्टूबर शनिकेँ सफल रूपेण सम्पन्न भेल।
एहि कार्यक्रमक शुरुवातमे वर्तमान राष्ट्रीय अध्यक्ष एवं पूर्व राष्ट्रीय अध्यक्ष द्वारा अध्यक्षीय संवाद सभा हेतु विचार प्रस्तुत भेल, आ कर्ण कायस्थ महासभा राष्ट्रीय पंजीकृत संस्थाक तमाम सदस्य, अभिभावक आ स्थानीय कर्णगोष्ठी समूहक संग सहभागिता देखल गेल।
कार्यक्रमक उद्घाटन चित्रगुप्त आरती/भजनक संग भेल आ परिचर्चाक विषय छल ‘कर्ण संस्कृति एवं टेक स्टार्टअप/करियर परामर्श पर विचार-विमर्श।’ पुनः नव सदस्य सभक परिचय भेल।
कार्यक्रममे परिवार-केन्द्रित मनोरंजनमे बच्चा सभक लेल क्विज़ भेलैक आ महिला सभक लेल म्यूज़िकल चेयर। मंचीय प्रस्तुतिमे बच्चा सभक प्रस्तुति, कॉम्पीयरिंग, गीत आ क्विज़ छलैक।
आयोजनक प्रभाव आ आभारक क्रममे ई कहल जा सकैछ जे कार्यक्रमक प्रस्तुति आ नेतृत्वक संयोजन सुगठित आ प्रेरक रहल।
कर्नाटक राज्य समितिक पदाधिकारीगण — अध्यक्ष विकास कुमार लाल दास, पूर्व अध्यक्ष बसंत दास, उपाध्यक्ष जटा शंकर, महासचिव सुष्मिता आनंद, पूर्व महासचिव शंकर कुमार दास एवं सचिव प्रवेश कुमारक योगदान स्पष्ट आ प्रशंसनिय रहल। संगहि रेणु दास, पलक रानी, मनोज कुमार लाल एवं शरदेंदु कुमार सहित सभ भागीदारक सराहनीय प्रदर्शनक उपरांत स्नेह मिलन कार्यक्रम सफलतापूर्वक संपन्न भेल।
सभाक मुख्य आकर्षण सभमे अभिभावक गणकेँ मंच पर शॉल, पाग आ प्रशस्ति पत्र रूपी मोमेंटो प्रदान कएल गेल। कर्ण कनेक्ट, कर्ण स्टार्टअप ग्रुपक भविष्यक नीति निर्धारण हेतु विशेष टीमक गठन हेतु विशेष व्हाट्स एप ग्रुपक शुरुआत भेनाई उल्लेखनीय मानल जा सकैत अछि।
मिथिलाक व्यंजनक विविधता आ भोजनक गुणवत्ताक उच्चस्तरक सराहना भेल। तत्पश्चात महिला सभा म्यूजिकल चेयर सह गायन प्रस्तुति मनोरम दृश्यमे आकर्षक छल।
सभाक अंतिम भागमे कविता पाठ, जगदम्बा श्लोक पाठ, महाभारतक ऊपर लिखल रामधारी सिंह दिनकरक कविताक प्रस्तुति आ केकेएम केर राष्ट्रीय कमेटी व पेट्रॉन सदस्य विजय बाबू द्वारा स्वरचित कविता पाठ दमदार सेशनमे सौं एक छल।
धन्यवाद ज्ञापनक बाद सभ बच्चा सभकेँ गिफ्ट, सभ भागीदार विजेता केर गिफ्ट आ सभ सुहागिन महिलाकेँ खोईंचक संग विदा कएल गेल।
निष्कर्षतः एहि समागमक मुख्य उद्देश्य अपन समुदाय आ कर्ण संस्कृतिकेँ सक्षम बनेबाक दिशामे निरंतर प्रयासक आवश्यकता स्पष्ट भेल। भविष्यक अवसर आ सहयोगक लेल आगा बढबाक प्रेरणा प्रदान कएल अछि। हम स्थानीय कर्णगोष्ठी समूह, सदस्य सभ आ कर्ण समुदायक समर्थनकेँ आभार व्यक्त करैत छी। एहि प्रकारक सम्मिलित प्रयाससँ सामाजिक-सांस्कृतिक समृद्धि आ युवा-विकासमे योगदान सुनिश्चित अछि।
रिपोर्ट: विजय कुमार (विजय बाबू)
केकेएम सह संस्थापक एवं संरक्षक सदस्य।
