बिहारक राजनीतिमे कांग्रेस नेता कन्हैया कुमारक कठिनाइ बढ़ि गेल अछि। हुनक पदयात्रा तऽ खत्म भऽ गेल, मुदा अपन देल गेल विवादित बयानक कारण परेशानी बढ़ि गेल अछि।
हालमे प्रधानमंत्री नरेंद्र मोदी आ आरएसएस पर कांग्रेस नेता द्वारा देल गेल एकटा बयानक खिलाफ बीजेपी नेता थानामे शिकायत दर्ज करौलन अछि। बीजेपीक दानिश इकबाल द्वारा पटनाक कोतवाली थानामे एकटा शिकायत दर्ज कएल गेल अछि। बीजेपी मीडिया सेलक अध्यक्ष दानिश इकबाल द्वारा थानामे देल गेल रिपोर्टक अनुसार कांग्रेस नेता कन्हैया कुमार नरेंद्र मोदीकेँ संघी आ आरएसएसकेँ आतंकवादी कहलनि अछि। कांग्रेस नेता केर एहि बयानसँ बीजेपी नाराज अछि आ ओकरा ई आपत्तिजनक लगैत अछि। बीजेपी नेता अपन रिपोर्टमे ईहो कहने छथि जे कांग्रेस नेता कन्हैया कुमार बेर-बेर एहेन शब्दक इस्तेमाल करैत छथि।
दानिश इकबाल शिकायतमे लिखलनि अछि, “हम अपन मित्र सभ आ कार्यकर्ता समक संग भाजपा प्रांत कार्यालय पटनामे इंटरव्यू देखि रहल छलहुँ। ओहिमे अमर्यादित भाषा सुनि क’ हम आ अन्य कार्यकर्ता आहत आ व्यथित भेलहुँ। साक्षात्कारक दौरान देशक प्रधानमंत्री आ संघ जकाँ राष्ट्रवादी संगठनकेँ आतंकवादी शब्दक संबोधन कय गारि देनाइ एकटख सञ्गेय अपराध अछि। निवेदन अछि जे उपरोक्त नामित व्यक्तिक विरुद्ध सुसंगत धारासभमे प्राथमिक दर्ज क’ कानूनी कार्यवाही करबाक कृपा कयल जाए।”
जनतब जे बिहार विधानसभासँ पहिने कन्हैया कुमार केर बिहारक राजनीतिमे एंट्री भेल अछि। पदयात्रासँ कन्हैया आ कांग्रेस बिहारक ज्वलंत मुद्दा सभकेँ लपकि लेलक अछि। पदयात्राक दौरान कांग्रेस केर पूर्व अध्यक्ष राहुल गांधी बेगूसराय अएला आ ओकर बाद पटनामे सचिन पायलट अएलाह। कांग्रेस आब बिहारमे अपन पुरान जमीन कन्हैया कुमार केर माध्यमसँ हासिल करय चाहैत अछि।
