प्रखंड क्षेत्रक कमला नदीक कनछेरेमे महिनाम घाट पर अवस्थित लगभग तीन सय वर्ष पुरान शिव मंदिर सिद्धेश्वर भूतनाथ पोहद्दीमे कला,संस्कृति एवं युवा विभागसँ आयोजित होमयवला सांस्कृतिक कैलेंडरक सूचीमें दर्ज कय सांस्कृतिक महोत्सव आयोजित करबाक मांग कयल गेल अछि ।
भाजपा प्रदेश कार्य समिति सदस्य रामनारायण ठाकुर आ सामाजिक कार्यकर्ता ऋषभ कुमार , हंसिका कश्यप कुहू आ कला एवं संस्कृति अधिकारी चंदन कुमारकें एहि संबंधमे एकटा ज्ञापन देलन्हि । आवेदनक माध्यमसँ कहल गेल अछि जे महिनाममे कमला नदीक किनछेर पर एगो निर्जन स्थान आ श्मशानमे महाकालक ई अद्भुत शिवलिंग स्थापित अछि । ओ एहि सिद्धपीठक प्राकृतिक सुंदरता आ एतुका शांत वातावरण केर उल्लेख करैत कहलन्हि जे ई माहौल श्रद्धालु सभकेँ बेर-बेर एतय अयबाक लेल प्रेरित करैत अछि । मंदिरक ऐतिहासिक महत्व सेहो बड़ रोचक अछि , एकर निर्माण सैकड़ों वर्ष पूर्व जोगियाराक जमींदार ललितेश्वर सिंहक परिजन करबौने छलाह ।
मंदिरमे वर्षमे दू बेर माघी आ कार्तिक पूर्णिमा पर विशाल मेला लगैत छैक । शिवरात्रि केर अतिरिक्त आन दिन सभमें सेहो दरभंगा, मधुबनी आ समस्तीपुर जिला सभसँ बहुत बेसीक संख्यामे श्रद्धालु एतय पूजा-अर्चना करय आबैत छथि । एहि शिव मंदिरसँ अनेको पौराणिक कथा जुड़ल अछि । जंगलमे मंदिरक स्थान, दक्षिणवाहिनी कमला नदीक बहाव आ श्मशानमे शिवलिंगक मोटाई लंबाई श्रद्धालु सभकें नव रामेश्वर ज्योतिर्लिंग सन देखाई दैत छन्हि । ई जगह मुंडन , यज्ञोपवीत आ विवाह एहेन धार्मिक अनुष्ठान सभ लेल सेहो महत्वपूर्ण अछि ।
हालांकि धार्मिक न्यास बोर्डक अधीन रहलाक बावजूदो एकर समुचित विकास नहि भऽ रहल अछि। कला एवं संस्कृति अधिकारी चंदन कुमार रामनारायण ठाकुरकेँ आश्वस्त कयलन्हि जे सांस्कृतिक महोत्सवक आयोजनक एकटा प्रस्ताव विभागक उच्चाधिकारी सभकेँ भेजल जायत । ओ इहो कहलनि जे हुनका एहि स्थान पर अयबाक अवसर भेटलन्हि अछि। ओ बेझिझक स्वीकार कयलन्हि जे प्रकृति वास्तवमे एहि जगहकेँ खूबसूरतीसँ सजौने अछि । एकर आर बेसी विकास हेबाक चाही।
