बिहारमे काल्हिसँ नवका बिजली दर लागू भऽ गेल अछि। बिहार विद्युत विनियामक आयोग पहिनेसँ एकर घोषणा कऽ चुकल अछि। ई दर अगिला वर्ष 31 मार्च धरि लागू रहत। एकर लाभ ओहि ग्रामीण उपभोक्ताकेँ होयत जकर मासिक 50 यूनिटसँ अधिक बिजलीक खपत होइत अछि।
चुनावसँ पहिने नीतीश कुमार सरकार लाखों उपभोक्ताकेँ राहत देलाक बाद बिजली दरमे कटौतीक घोषणा कएलक अछि। राज्यमे एहिसँ ग्रामीण आ शहरी दुनू उपभोक्ताकेँ लाभ होयत। 1 अप्रैल 2025 सँ लागू होबय वाला एहि दरक तहत स्मार्ट प्रीपेड मीटर उपभोक्ताकेँ 25 पैसा प्रति यूनिट छूट भेटत, जखनि कि ग्रामीण इलाकाक बिजली 54 पैसा प्रति यूनिट सस्ता होयत। जकरा मासिक 50 यूनिटसँ अधिक बिजलीक खपत होइत अछि, ओहि ग्रामीण उपभोक्ताकेँ ई लाभ भेटत। एहि श्रेणी केर सवा करोड़ उपभोक्ताकेँ एकर लाभ होयत।
राज्य सरकार स्मार्ट मीटरक उपभोक्ता लेल विशेष छूट देबाक निर्णय कएलक अछि। स्मार्ट मीटर लगेबाक 6 मास धरि उपभोक्ता निर्धारित लोडसँ बेसी बिजली खपत करबा पर कोनो जुर्माना नहि लागत। खास क’ ग्रामीण क्षेत्रमे ई उपभोक्ता सभक लेल कुल 79 पैसा प्रति यूनिट धरि बचत होयत। कोल्ड स्टोरेजक लेल एकटा नव श्रेणी बनायल गेल अछि। 74 किलोवाट धरि अनुबंध मांग वला कोल्ड स्टोरेजकेँ एलटी-आईएएस श्रेणीमे राखल गेल अछि, जखनकि 50 केवीएसँ 1500 केवीए धरि क्षमतावला कोल्ड स्टोरेजकेँ अलग श्रेणी देल गेल अछि।
औद्योगिक इकाई सभक लेल बिजली दरमे वृद्धि केर प्रस्तावकेँ खारिज कयल गेल अछि। संगहि, डिजिटल भुगतान करय वला औद्योगिक उपभोक्ता सभकेँ 1% या अधिकतम 50,000 रुपैया धरि छूट देल जायत।