केन्द्रीय मंत्री जीतन राम मांझी बिहारमे पुल ढहबाक घटनामे गड़बड़ी होयबाक आशंका व्यक्त कयलनि अछि। हुनकर कहब छनि जे एक मास पहिने पुल किएक नहिं खसि रहल छल ?
बिहारमे पुल ढहबाक घटना पर एक बेर फेर राजनीति गर्म भऽ गेल अछि। तेजस्वी यादव सहित सभ विपक्षी नेता जतय लगातार सरकार पर हमला कऽ रहल छथि, ओतहि एहि बीच केंद्रीय मंत्री जीतन राम मांझीक बयान सामने आबि गेल अछि। ओ बिहारमे पुल ढहबाक घटनाकेँ षड्यंत्र बतौलनि अछि। मांझी पुछलनि जे एक मास पहिने बिहारमे पुल किएक नहिं खसि रहल छल। आब ओ किएक खसि रहल अछि ? जीतन राम मांझी आरोप लगओलनि जे ई भाजपा नेतृत्ववला राज्य सरकारकेँ बदनाम करबाक षड्यंत्र अछि।
पछिला १० दिनमे अररिया, सीवान, पूर्वी चम्पारण, किशनगंज आ मधुबनी सहित विभिन्न जिलामे पाँचटा पुल ढहि गेल। जीतन राम मांझी एकटा प्रेस कॉन्फ्रेंसमे कहलनि “ई चिन्ताक विषय अछि जे बिहारमे पुल ढ़हि रहल अछि। एहन लगैत अछि जे घटिया सामग्रीक उपयोग जरूर कयल गेल होयत। मुदा १५ दिन या एक महीना पहिने पुल किएक नहि खसि रहल छल ? आब ओ किएक खसि रहल अछि ? की एकर पाछू कोनो षड्यंत्र अछि ?”
माँझी सुझाव देलनि जे “ई सब जानिबूझि कए सरकारक छवि खराब करबाक लेल कयल जा रहल अछि। पुल लगातार खसि रहल अछि, हमरा लगैत अछि जे ई जानिबूझि कए कयल जा रहल अछि।” माँझी यद्यपि स्वीकार कयलनि जे ठेकेदार घटिया निर्माण सामग्रीक उपयोग कऽ रहल अछि, जे पुल ढहबाक एकटा कारण भऽ सकैत अछि।
ओ कहलनि “राज्य सरकार पुल ढहबाक लेल जिम्मेदार ठेकेदार आ अभियन्ताक खिलाफ सख्त कारवाई कऽ रहल अछि। अधिकारी लोकनि एहि मामिलाक जाँच कऽ रहल छथि आ हम हुनका सभसँ षड्यंत्रक कोणक सेहो जाँच करबाक अनुरोध करैत छी। पूर्व मुख्यमंत्री भविष्यमे एहन घटनाकेँ रोकबाक लेल गहन जाँच आ कठोर उपायक आवश्यकतापर जोर देलनि। ओ आश्वासन देलनि कि, “सरकार सुनिश्चित करत जे एहेन दोबारा नहिं होय।”
