झारखण्डक राज्यपाल सीपी राधाकृष्णन झामुमो-कांग्रेस-राजद गठबंधनक नव नेता हेमंत सोरेनकेँ नव मुख्यमंत्रीक रूपमे नियुक्त कऽ सरकार बनेबाक लेल आमंत्रित कयलनि अछि। हेमंत सोरेन ७ जुलाईकेँ शपथ लेताह।
शपथ ग्रहण समारोहक स्थल आ समय एखन धरि तय नहिं भेल अछि। ओना, कहल जाइत अछि जे शपथ ग्रहण समारोह राँचीक मोरहाबादी मैदानमे आयोजित कयल जायत।
राज्यपालक आह्वान पर हेमंत सोरेन बृहस्पति दिन दुपहरमे इंडिया गठबंधनक शीर्ष नेताक संग राजभवन पहुँचलाह, जतय औपचारिक नियुक्ति पत्र सौंपि हुनका औपचारिक रूपसँ सरकार बनेबाक लेल आमंत्रित कयल गेल।
सूत्रक अनुसार हेमंत सोरेन फुल बेंच केबिनेटक संग शपथ लेताह। हुनका संग १० वा ११ मंत्री शपथ लऽ सकैत छथि। एखन मंत्री सभक नाम पर मंथन कएल जा रहल अछि।
एहिसँ पहिने झारखण्डक मुख्यमंत्री चंपई सोरेन बुधदिन साँझ ७.१५ बजे राजभवन पहुँचलाह आ राज्यपाल सीपी राधाकृष्णनकेँ अपन इस्तीफा सौंपि देलनि। एकर संगहि सत्तारूढ़ गठबंधनक नव नेता हेमंत सोरेन नव सरकारक लेल दावा प्रस्तुत कयलनि आ ४५ विधायकक समर्थनक पत्र राज्यपालकेँ सौंपने छलथि।
ई तेसर बेर होएत जखन हेमंत सोरेन मुख्यमंत्रीक शपथ लेताह। ओ पहिल बेर २०१३ मे मुख्यमंत्री बनलाह। एकर बाद २०१९ मे हेमंत सोरेनक नेतृत्वमे झामुमो-कांग्रेस-राजद गठबंधन चुनाव लड़लक आ ओ दोसर बेर मुख्यमंत्री बनलाह। हेमंत सोरेन झारखंडमे मुख्यमंत्रीक शपथ लेनिहार तेसर नेता होयताह। एहिसँ पहिने हुनक पिता शिबू सोरेन आ भाजपाक अर्जुन मुण्डा तीन-तीन बेर मुख्यमंत्रीक शपथ लऽ चुकल छथि।
३१ जनवरीकेँ जखन ईडी हेमंत सोरेनकेँ भूमि घोटालासँ जुड़ल धनशोधनक मामिलामे गिरफ्तार कयलक, तखन ओ मुख्यमंत्रीक पदसँ इस्तीफा दऽ देलनि। चम्पई सोरेन, जे हुनक मंत्रिमंडलमे छलाह, २ फरवरीकेँ मुख्यमंत्रीक पदभार सम्हारलनि।
पाँच मासक बाद हेमंत सोरेन उच्च न्यायालयसँ जमानत भेटैत २८ जूनकेँ जेलसँ बाहर आबि गेलाह आ छठम दिन गठबंधन चम्पई सोरेनक स्थान पर एक बेर फेर हेमंत सोरेनकेँ मुख्यमन्त्री बनयबाक निर्णयपर मुहर लगा देलक।
