मिथिला क्षेत्रीय झारखंडक गोड्डाक भाजपा सांसद निशिकांत दुबे झारखण्डक हजारो स्कूलमे रविदिनक बदला शुक्रदिन छुट्टी देबाक आ रमजानक दौरान मुस्लिम कर्मचारीसभकेँ विशेष रियायत देबाक कथित आदेशक हवाला दैत राज्य सरकार पर पैघ हमला कयलनि अछि। निशिकांत दुबे सोशल मीडिया प्लेटफॉर्म एक्स पर लिखलनि, ‘झारखंड आब इस्लामिक राज्य अछि। झारखण्ड सरकार स्वयं स्वीकार करैत अछि जे ६४८ विद्यालयमे छुट्टी रविदिनक बदला शुक्रदिन होइत अछि। ई आदेश २००७ मे कांग्रेस सरकारक अवधिमे लागू कयल गेल छल। भाजपा सांसद २ अगस्त, २०२४केँ शून्यकालमे संसदमे ई मुद्दा उठौलनि।
जबाबमे केन्द्र सरकार झारखण्ड सरकारकेँ पत्र लिखि एहि मामिलामे स्पष्टीकरण माँगलक अछि। झारखण्ड सरकार १० जनवरी, २०२५ केँ केन्द्रकेँ लिखित उत्तर पठौलक।
केन्द्रीय शिक्षा राज्य मंत्री जयंत चौधरी झारखण्ड सरकारक प्रतिक्रियाक हवाला दैत निशिकान्त दुबेकेँ सूचित कयलनि अछि जे एकीकृत बिहारक समयमे झारखण्डमे कुल ६४८ विद्यालयकेँ उर्दू विद्यालयक रूपमे नामित कयल गेल छल, आ सितम्बर २००७ मे झारखण्ड सरकार द्वारा जारी आदेशक माध्यमसँ एहि विद्यालयसभमे रविदिनक बदला शुक्रदिन छुट्टी अछि।
निशिकांत दुबे झारखंड सरकारक प्रतिक्रियाकेँ अस्पष्ट बतौलनि अछि। ओ कहलनि जे एहेन स्कूलक संख्या हजारमे अछि, जतय नाम जबरदस्ती उर्दूसँ जोड़ल गेल अछि आ शुक्रदिन हुनका सभक छुट्टी अछि।
एहिसँ पहिने रविदिन एकटा आओर सोशल मीडिया पोस्टमे ओ राज्य पर रमजानक दौरान मुस्लिम कर्मचारीसभकेँ विशेष रियायत देबाक आरोप लगबैत लिखलनि, “झारखण्डकेँ इस्लामी राज्य घोषित करबाक समय आबि गेल अछि। कांग्रेस मात्र मुसलमानक संग अछि।”
एहि पोस्टक सङ्ग सांसद २००९ मे राज्य सरकार द्वारा जारी एकटा पत्रक प्रति सेहो साझा कयलनि, जाहिमे उल्लेख अछि जे मुस्लिम कर्मचारीसभकेँ रमजानक दौरान साँझ चारि बजे कार्यालयसँ बाहर निकलबाक अनुमति देल जाइत अछि आ जुम्माक नमाजक लेल दुपहरमे २ सँ ४ बजे धरि छुट्टी देबय संबधी आदेशक उल्लेख अछि।
