मुख्यमंत्री नीतीश कुमारक अध्यक्षतामे राज्य मंत्रिमंडलमे काल्हि झंझारपुर प्रखंडक खैरा घाट (पश्चिमी तटबंध) आ भदुआर घाट (पूर्वी तटबंध) केर बीच कमला नदी पर आरसीसी पुल आ एप्रोच रोडक निर्माण लेल 154 करोड़ 12 लाख 53 हजार रुपयाक योजनाकेँ मंजूरी देल गेल। एही सम्बन्धमे काल्हि बिहार पथ निर्माण विभागक सचिव संदीप कुमार आर पुडकलकट्टी प्रेस नोट जारी कयलनि।
ई जनतब दैत राज्यसभा सांसद संजय झा सोशल साइट्स पर लिखलनि, “हमरा शेयर करैत खुशी भऽ रहल अछि कि मधुबनी जिला अंतर्गत झंझारपुर प्रखंडक खैरा घाट (पश्चिमी तटबंध) आ अंधराठाढ़ी प्रखंडक भदुआर घाट (पूर्वी तटबंध) केर बीच कमला नदी पर आरसीसी पुल एवं पहुंच पथक निर्माण लेल 154 करोड़ 12 लाख 53 हजार रुपयाक योजनाक आइ माननीय मुख्यमंत्री नीतीश कुमार जी केर अध्यक्षतामे राज्य मंत्रिमंडल मंजूरी देलक अछि।
एहि पुलक निर्माणसँ दुनू प्रखंडक बीच आवागमन सुगम होएत, जाहिसँ लाखों लोक लाभान्वित होएत। क्षेत्रमे विकासकेँ गति देबयवाला एहि महत्वपूर्ण योजनाकेँ मंजूरी देबय लेल माननीय मुख्यमंत्री नीतीश कुमार जीकेँ झंझारपुर आ अंधराठाढ़ी प्रखंडक निवासी दिसिसँ कोटिश: आभार एवं अभिनंदन।”
प्रेस विज्ञप्तिमे कहल गेल अछि जे एही पूलसँ आवागमन आसान आ दुनू प्रखंडक सम्पर्कता सुलभ होयत जाहिसँ विकासमे वृद्धि होयत। एही सम्बन्धमे जखनि ओतय केर निवासीकेँ जनतब देल गेल तऽ लोक हर्षित छलथि।
एही सम्बन्धमे बिहार सरकारक मंत्री नितीश मिश्रा सेहो कहलनि, “एहि पुलक निर्माणसँ दूनू प्रखंडक बीच आवाजाहीमे सुविधा होएत, जाहिसँ लाखों लोककेँ फायदा होएत। झंझारपुर आ अंधराठाढ़ी प्रखंडक निवासीक दिसिसँ मुख्यमंत्री नीतीश कुमारकेँ धन्यवाद आ बधाई दैत छी। एहि महत्वपूर्ण योजनाक मंजूरीसँ क्षेत्रमे विकास होयत।”
