स्वीप कोषांग द्वारा आयोजित जीविका दीदी सभ ग्रामीण क्षेत्रमे चलौलनि मतदाता जागरूकता अभियान

सहरसा समदिया
*

लोकसभा आम निर्वाचन : 2024, मतदान तिथि पर अधिकतम मतदाता भागीदारी सुनिश्चित करबाक उद्देश्यसँ, जिला स्वीप प्रकोष्ठ द्वारा, शुक्र दिन, कहरा प्रखंडसँ संबंधित पंचायतमे जीविका केर सौजन्यसँ, पैघ पैमाना पर संचालित मतदाता जागरूकता अभियानक तहत, सुलिन्दाबाद, दिवारी, बरियाही आ सिरादेपट्टीमे मतदाता जागरूकता कार्यक्रम आयोजन कयल गेल। कार्यक्रमक आयोजनक क्रममे रैली आ रंगोलीक माध्यमसँ क्षेत्र भ्रमण कए मतदातासँ लोकतंत्रक महा पाबनिमे उत्साहपूर्ण भागीदारी करबाक अपील कयल गेल।तहिना जिला अन्तर्गत नोहट्टा पश्चिमी नगर पंचायतमे जीविका दीदी 7 मई कए मतदान प्रक्रियामे उत्साहपूर्वक सहभागिता लेल कैंडल मार्चक माध्यमसँ क्षेत्रक मतदातासँ अपील कयलनि अछि। जिला अंतर्गत अन्य क्षेत्रमे सेहो आयोजित मतदाता जागरूकता कार्यक्रमक माध्यमसँ जीविका मतदान प्रक्रियामे भाग लेबाक लेल मतदाताकेँ प्रेरित कएल जा रहल अछि।