केंद्रीय मंत्री आ हिंदुस्तानी आवाम मोर्चा प्रमुख जीतन राम मांझी बिहारमे मतदाता सूचीमे विशेष गहन संशोधनक फैसलाक स्वागत कयलनि अछि। विपक्षकेँ निशाना बनाबैत ओ कहलनि जे, ई सभ बहुत रास विधानसभा क्षेत्रमे भारी संख्यामे नकली (बोगस) मतदाता तैयार कयने अछि, जाहिसँ संशोधनमे परेशानीक सामना करय पड़ि रहल अछि।
पटनामे पत्रकार सभसँ बात करैत ओ काल्हि चुनाव आयोगक मतदाता संशोधनक खिलाफ विपक्षक साजिश रचय वला केर बारेमे कहलनि जे, “हमरा सभकेँ पता अछि जे किछु विधानसभा क्षेत्रमे 20 सँ 30 हजार बोगस मतदाताक निर्माण भेल अछि। संशोधनक दौरान ई सभ हटा देल जाएत। एहि डरक कारण ओ सभ चिंतित छथि। सच केर की नुकसान भऽ सकैत अछि ? जँ सही अछि तखनि ओ सभ किएक डरैत छथि ?”
ओतहि 29 जूनकेँ राजगीरमे लोजपा (रामविलास) द्वारा आयोजित बहुजन भीम संगमक संबंधमे ओ कहलनि जे इ नीक गप अछि। पार्टी एनडीएकेँ मजबूत करयमे लागल अछि। बिहार विधानसभामे प्रतिपक्षक नेता तेजस्वी यादवकेँ कलम बांटय पर केंद्रीय मंत्री जीतन राम मांझी हुनका पर व्यंग करैत कहलनि जे हुनकर पिता लालू यादव लाठी पर तेल लगाबैत छलाह। हुनका ई बात मोन रखबाक चाही।
तेजस्वी यादवक बिहारक जनतासँ 20 महीना मांगला पर हिंदुस्तानी आवाम मोर्चाक प्रमुख जीतन राम मांझी कहलनि जे लोकसँ मांगि रहल छथि, मुदा हुनका नहि भेटय वाला अछि। बिहारक जनता हुनकर पिता लालू यादवक जंगलराज देखलक। आइयो राजदक लोक गरीबक जमीन हड़पि लैत अछि। आइ बिहारमे भऽ रहल अधिकांश आपराधिक घटनामे राजदक लोक शामिल अछि। 20 महीना बिसरि जाउ, जँ 10 महीना धरि राजद सत्तामे आबि जाएत तँ राज्यमे गृहयुद्ध भड़कि जाएत।
पश्चिम बंगालमे सामूहिक बलात्कारक घटना पर ओ कहलनि जे ओतय एकटा महिला मुख्यमंत्री छथि आ महिलासँ छेड़छाड़ आ यातना भऽ रहल अछि। ओ एहि तरहक घटनाकेँ समाज आ सरकार पर खराब दाग सेहो बतौलनि। ओ स्पष्ट रूपसँ कहलनि जे ममता बनर्जीकेँ मुख्यमंत्री पदसँ इस्तीफा देबाक चाही।
