भाजपा प्रवक्ता अजय आलोक कहलनि जे लाखो हिन्दूक आस्थासँ खेलनिहार पर कठोर कार्यवाही कयल जायत। होली आ शुक्रक नमाज एक सङ्ग होइत अछि। जँ कियो गड़बड़ी उत्पन्न करैत अछि तँ एकर परिणाम गम्भीर होयत।
औरंगजेब, हिन्दू राष्ट्र, बिहार हिन्दू राज्य, बाबा बागेश्वर आ होली आ जुम्माक नमाजक संयोगक संबंधमे भाजपा नेताक बयान जदयूकेँ असहज कऽ देलक अछि। एकर अतिरिक्त, आशंका अछि जे नीतीशक धर्मनिरपेक्ष छवि खराब भऽ सकैत अछि। जदयू प्रवक्ता अभिषेक झा’क बयान एहि दिशामे इशारा करैत अछि। ओ कहलनि जे आगामी विधानसभा चुनावक एजेंडा सुशासन आ विकास अछि आ राजगकेँ एहि पर ध्यान देबाक आवश्यकता अछि। चुनाव एहि मुद्दा पर लड़ल जायत, हिन्दू-मुस्लिम एजेंडा पर नहि।
जेडीयू नेता कहलनि जे ई देश हिन्दू राष्ट्र नहि बल्कि धर्मनिरपेक्ष राष्ट्र अछि। जाहिमे सभ समुदायक लोक एक संग रहैत छथि। बिहारमे सेहो इहे मॉडल प्रचलित अछि। अभिव्यक्तिक स्वतंत्रता’क नाम पर केकरो संविधानसँ छेड़छाड़क अनुमति नहि अछि। होली जुम्माक नमाज एक्कहि दिन पड़ि रहल अछि। पिछला 10 सालमे इ चारि बेर भेल अछि। बिहारमे हर बेर एकरा शांतिपूर्ण ढंगसँ मनाओल गेल अछि। होली आ शुक्रक नमाज पर टिप्पणी नहि करू।
ओतहि भाजपा जदयूक चेतौनिक स्पष्ट जवाब देलक अछि। भाजपाक राष्ट्रीय प्रवक्ता अजय आलोक कहलनि जे करोड़ो हिन्दूक आस्थासँ खेलनिहार पर कठोर कार्यवाही कयल जायत। देश एकटा हिन्दू राष्ट्र अछि। एहि पर केकरो कोनो संदेह नहि हेबाक चाही। जे औरंगजेबक पूजा करैत छथि हुनकर खिलाफ कार्यवाही होयबाक चाही। जे वातावरण खराब करैत अछि ओकरा बख्शल नहि जायत। होली आ जुम्माक नमाज एक संग अछि। जँ कियो गड़बड़ करैत अछि तखनि एकर परिणाम बहुत खराब होयत। भाजपा जेडीयूक संग अछि। पीएम मोदी आ नीतीश मजबूतीसँ एक संग छथि।
भाजपासँ असहज जदयू आब राजदक निशाना पर आबि गेल अछि। राजद प्रवक्ता ऋषि मिश्रा कहलनि जे मुख्यमंत्री नीतीश राजदक शासनक बात करैत बेर-बेर वर्ष २००५ मे पहुँचि जाइत छथि। आइ हम अहांकेँ वर्ष 2013 मे लए जाएब। 2013 मे की भेल जे नीतीशकेँ भाजपासँ अलग होए लेल मजबूर केलक ? हम सब कारण जनैत छी। अहाँ नहि चाहैत छलहुँ जे मोदी देशक प्रधानमंत्री बनथि किएक तँ हुनक भाषण समाजक लेल विभाजनकारी छल।
ओ कहलनि जे आइ नीतीशक शासनमे अहाँक सहयोगी भाजपाक किछु नेता बिहारमे समाजकेँ बांटय केर कोशिश कऽ रहल छथि। आब अहां (नीतीश कुमार) की करब ? की अहां किछु करबाक स्थितिमे छी वा नहि ? बिहारक लोक ई जानय चाहैत छथि किएक तँ ओ सभ प्रेमसँ एक संग रहय चाहैत छथि।
