जदयू एमएलसी नीरज कुमार कहलनि जे लालू प्रसाद यादव पटनाक सड़क पर घूमैत छथि। ओ मरीन ड्राइव जाइत छथि। आखिर की कारण अछि जे लालू प्रसाद यादव के राजनीतिक स्वीकार्यता केर नकारल जा रहल अछि ?
बिहार विधान परिषदक जनता दल (यूनाइटेड) केर सदस्य आ मुख्य प्रवक्ता नीरज कुमार एक बेर फेर तेजस्वी यादवसँ सवाल पूछलनि अछि। हालक दिनमे नीरज कुमार द्वारा तेजस्वी यादव पर वेतन घोटालाक आरोप लगाबय आ वेतन घोटालासँ जुड़ल ७०० पन्नाक दस्तावेज चुनाव आयोगमे देलाक बाद नीरज कुमारक उपर तेजस्वी यादव मानहानि केर नोटिस भेजने छलाह, जेकर बाद नीरज कुमार कहने छलाह जे हम नोटिससँ नहि डरैत छी। एकर उत्तर देब।
आब एक बेर फेर नीरज कुमार शनि (२ नवंबर) केँ तेजस्वी यादव पर पैघ हमला कयलनि अछि। ओ कहलनि, बिहार आ झारखंड विधानसभा चुनावक उपचुनावमे लालू प्रसाद यादव किएक सक्रिय नहि छथि ?
ओ कहलनि, लालू प्रसाद यादव राष्ट्रीय जनता दलक स्टार प्रचारक छथि, तखन ओ कतए गायब छथि ? लालू प्रसाद यादवकेँ के रोकने अछि ? नीरज कुमार कहलनि जे लालू यादव एकटा सक्षम नेता छथि। हुनका किएक अक्षम कए देल गेल अछि ?
जदयू प्रवक्ता कहलनि, “लालू प्रसाद यादव पटनाक सड़क पर घूमैत छथि। ओ मरीन ड्राइव जाइत छथि। आखिर की कारण अछि जे लालू प्रसाद यादवक राजनीतिक स्वीकार्यता केर नकारल जा रहल अछि ? राजदक भीतर लालू प्रसाद यादवकेँ नजरबंद करबाक लेल के जिम्मेदार अछि ? एकर खुलासा करू। तेजस्वी यादव बताबथि जे राष्ट्रीय जनता दलक स्टार प्रचारक लालू प्रसाद यादव कतए छथि ?
नीरज कुमार आगू कहलनि जे बिहारमे उपचुनावक लेल महागठबंधनक उम्मीदवारक नामाङ्कनमे ओ उपस्थित नहिं छलाह। ओ झारखण्डमे उपस्थित नहिं भेलाह। आखिर लालू यादवकेँ घरमे के नजरबंद कयलक अछि ? एहि तथ्यक खुलासा करबाक चाही। की लालू यादव अक्षम भऽ गेलाह ?
