रुपौली उपचुनावकेँ लऽ कऽ राजनीतिक हलचल तेज भऽ गेल अछि। ओतहि जेडीयू एहि सीटसँ उम्मीदवारक संबंधमे शुक्रकेँ घोषणा कयलक।
जेडीयू कलाधर प्रसाद मंडलकेँ रुपौलीसँ अपन उम्मीदवार घोषित कयलक अछि। जेडीयू रुपौली उपचुनावक लेल अपन उम्मीदवारक घोषणा कऽ देलक अछि। लोकसभा चुनाव समाप्त भेलाक बाद आब बिहारक रुपौली विधानसभा सीटक लेल चुनावी लड़ाई देखल जायत। रुपौली सीट पर रोमांचक मुकाबला होएत।
जनतब जे बीमा भारती रुपौली सीटसँ जेडीयू केर टिकटसँ चुनाव जीतलाक बाद २०२० मे विधानसभा पहुंचलीह, मुदा एहि लोकसभा चुनावमे ओ जेडीयू छोड़ि राजदमे शामिल भऽ गेलीह। राजद हुनका पूर्णिया सीटसँ लोकसभाक उम्मीदवार बनौलक। बीमा भारती एहि सम्बन्धमे अपन विधायकीसँ इस्तीफा दऽ देने छलीह।
निर्वाचन आयोगक अधिसूचनाक अनुसार रुपौली उपचुनावक लेल नामांकन दाखिल करबाक अंतिम तिथि १४ जून सँ २१ जून अछि। २४ जूनकेँ जांच होएत आ २६ जूनकेँ नाम वापिस लेबाक अंतिम तिथि अछि। उपचुनाव १० जुलाईकेँ होयत आ मतगणना १३ जुलाईकेँ होयत।
एहि बेर रुपौलीमे राजनीतिक लड़ाई रोचक होबय जा रहल अछि। जेडीयू उम्मीदवारक नामक घोषणा कऽ देलक अछि, मुदा आब देखबाक अछि जे महागठबंधनक पालामे ई सीट केकरा भेटत। एतयसँ कांग्रेस वा राजद केकर उम्मीदवार होएत ? पप्पू यादव पूर्णिया लोकसभा सीट पर निर्दलीय उम्मीदवारक रूपमे जीति चुकल छथि। ओ कांग्रेसक सङ्ग छथि आ कहलनि अछि जे ओ एहि सीटसँ कांग्रेसक उम्मीदवार ठाढ़ करताह। राजद एहि पर प्रतिक्रिया देलक अछि जे आलाकमान एहि पर निर्णय लेत, मुदा सवाल उठि रहल अछि जे की बीमा भारती एतयसँ महागठबंधनक उम्मीदवार होयतीह ? वा कोनो आओर बनाएल जाएत ? आ तखन पप्पू यादवक रुख की होयत।
