जदयू नेता संजय झा आ ललन सिंह बतेलनि नीतीश कुमारक उपलब्धि, कहलनि जाएत बिहार टाॅप गियरमे

पटना समदिया
*

केंद्रीय मंत्री ललन सिंह कहलनि जे आइ महिला सभ समाजमे तेजीसँ आगू बढ़ि रहल छथि। कदमसँ कदम मिला क’ चलि रहल छथि। नीतीश कुमार लगातार महिला सभकेँ सशक्त क’ रहल छथि।

बिहारक सभ राजनीतिक पार्टी चुनावी रणनीति बनाबयमे व्यस्त अछि। एनडीए आ महागठबंधन द्वारा अपन-अपन जीतक दावा कयल जा रहल अछि। एहि बीच, जेडीयूक राष्ट्रीय कार्यकारी अध्यक्ष संजय झा’क प्रतिक्रिया आयल अछि। ओ कहलनि जे दलितक लेल जतेक काज नीतीश कुमार कयलनि, ओतेक कियो नहि कयलनि। 2005 क’ बाद दलितक’ लेल नीतीश कुमार कतेको निर्णय लेलनि अछि, जाहिसँ हुनक’ जीवनमे पैघ बदलाव आयल अछि। आर्थिक आ सामाजिक दृष्टिसँ सेहो दलित बहुत मजबूत भेल अछि।

ओ कहलनि जे आई केन्द्र आ राज्यमे डबल इंजनक सरकार अछि। असली स्वर्णिम काल बिहारक आब आएल अछि। अगिला 5 वर्षमे बिहार तेजीसँ विकासक दिसि बढ़त। डबल इंजन सरकारक लाभ बिहारकेँ भेटि रहल अछि। एनडीए 2025 केर विधानसभा चुनाव मुख्यमंत्री नीतीश कुमारक नेतृत्वमे लड़त। बिहारकेँ बैक गियरमे नहि टॉप गियरमे आगू लऽ जायल जायत।

केंद्रीय मंत्री ललन सिंह कहलनि जे नीतीश कुमार जखनि मुख्यमंत्री बनलाह तँ नारा देलनि ‘न्यायक संग विकास, समाजक हर तबकाक विकास। मुदा जे समाजमे हाशियापर छल, हुनका समाजक मुख्य धारामे अनबाक संकल्प लेलनि आ दलितक हालतमे पैघ परिवर्तन भेल। ओ कहलनि जे समाजक विकास ताधरि नहि भ’ सकैत अछि जाधरि महिलाक विकास नहि होयत। महिलाक लेल पंचायतमे 50 प्रतिशत आरक्षण देल गेल अछि। आई महिला समाजमे तेजीसँ आगू बढ़ि रहल छथि। कदमसँ कदम मिला क’ चलि रहल छथि। नीतीश कुमार निरंतर महिलाकेँ सशक्त बनेबामे लागल छथि।

ललन सिंह लालू यादवक शासनकाल पर सेहो निशाना साधलनि। ओ कहलनि जे किछु लोक अपन परिवारकेँ बढ़बैत रहल अछि। महिलाक पंचायतक आरक्षणमे सेहो रुकावट डाललक। मुदा नीतीश कुमार महिलाक पंचायतमे आरक्षण देलनि। आई जे सभ शासनक सपना देखि रहल अछि, तिनकासँ सतर्क रहबाक चाही, एहेन लोकक सपनाकेँ चूर-चूर करबाक अछि।