जिलाक बायसी थाना क्षेत्रमे राजद विधायक सैयद रुकुनुद्दीन अहमदक आवास पर जदयू नेता रेहान फैजलकेँ बंधक बना पीटल जयबाक मामिलामे कारवाई शुरू भऽ गेल अछि। पुलिस विधायक सहित छह आरोपीक खिलाफ वारंटक लेल अदालतमे आवेदन कयलक। एम्हर पुलिस कहलक अछि जे एहि मामिलाक जाँच हर स्तर पर कयल जायत।
जिलामे जनता दल (यूनाइटेड) केर एकटा नेता बृहस्पति दिन आरोप लगओलनि कि राष्ट्रीय जनता दल (आरजेडी) केर एकटा स्थानीय विधायकक समर्थक हुनका पीटलक आ पेशाब पीबय लेल मजबूर कयलक। बायसी अनुमंडल पुलिस पदाधिकारी (एसडीपीओ) आदित्य कुमारक अनुसार, पीड़ित रेहान फजल द्वारा दायर शिकायतक आधार पर प्राथमिकी दर्ज कयल गेल अछि आ हुनकर इलाज स्थानीय अस्पतालमे चलि रहल अछि। पुलिस एफ.आई.आर.मे विधायक सहित आधा दर्जन लोककेँ आरोपी बनौने अछि।
अधिकारी बतौलनि, “फजल आरोप लगओलनि जे बुधदिन राति बायसी विधायकक गुण्डासभ हुनका अपहरण कऽ विधायकक निवास लऽ गेल।” कुमार कहलनि, “हुनका संदेह छनि जे विधायक हुनकासँ नाराज छलाह किएक तँ ओ जमीन हड़पब आ परिवारक सदस्यक नाम पर नकली मनरेगा जॉब कार्ड बनाबय सन गतिविधिक पर्दाफाश कऽ रहल छलाह।” फजल आरोप लगओलनि जे हुनका लाठी आ मोटरसाइकिल ‘शॉकरसँ पीटल गेल।
पीड़ित बतौलनि जे राजद विधायक अपन परिवारक सभ सदस्यक लेल जॉब कार्ड बनौने छलाह। ई कार्ड मनरेगा योजनाक अन्तर्गत बनाओल जाइत अछि। एकर अतिरिक्त, विधायक अवैध रूपसँ एकटा महिलाक जमीन सेहो हड़पि लेने छलाह। एहि मामिलामे पीड़ित नेता महिलाक मदति कऽ रहल छलाह। ओ आरोप लगओलनि जे जखनि ओ बाजार गेलाह तखनि विधायकक गुण्डासभ हुनकर अपहरण कऽ लेलक आ गम्भीर रूपसँ पीटि देलक।
अधिकारी बतौलनि जे हुनक एक हाथ आ एकटा टांगमे फ्रैक्चर अछि। ओ कहलनि जे शिकायतकर्ता इहो दावा कयलनि जे जखन ओ पानि माँगलनि तखनि हुनका पीबाक लेल मूत्र देल गेलनि।
शिकायतकर्ता पुलिसकेँ कहलक जे विधायकक समर्थक हुनका पर चाकूसँ हमला करय बला छलाह, मुदा हुनक पत्नी, परिवारक अन्य सदस्य आ स्थानीय लोक घटनास्थल पर पहुँचि हल्ला कयलक, जाहिसँ आरोपी भागि गेल। विधायकसँ एखनि धरि कोनो सम्पर्क नहि भेल अछि। पुलिस कहलक जे जाँच जारी अछि।
