बिहार विधानसभाक मानसून सत्र सोम (२२ जुलाई) सँ शुरू हेबाक अछि। एहि संबंधमे जदयू मंत्री जयंत राज कहलनि जे सरकार शुरू होबय बला विधानसभाक मानसून सत्रक लेल पूरा तैयार अछि। सरकार विपक्षक सभ सवालक जवाब देत। सरकार अपराधक मुद्दा पर सेहो जवाब देत। विपक्ष धमकी दैत अछि जे, जँ अपराध पर चर्चा नहिं भेल तखन विधानसभा नहिं चलय देल जायत, ताहि पर जयंत राज कहलनि जे नीतीश कुमारक सरकार सुशासनक सरकार अछि आ हम सभ सुशासनक अन्तर्गत काज करैत छी।
मंत्री जयंत राज कहलनि जे नीतीश कुमार नहिं तऽ केकरो फंसाबैत छथि आ ने ककरो बचाबैत छथि आ अपराधीक खिलाफ कारवाई कयल जाइत अछि। केंद्रीय मंत्री जीतन राम मांझीक एहि बयानक बारेमे पूछला पर कि नीतीश कुमार हमर पार्टीकेँ समाप्त करय चाहैत छलथि, राज कहलनि, हमरा आइ धरि नीतीश कुमारक कोनो एहेन बयान याद नहिं अछि। ओ कहलनि, जीतन राम माँझी जरूर मनगढ़ंत बात कए रहल हेताह। जीतन राम मांझीक २५ सीटक माँग पर ओ कहलनि जे हुनक मांग भऽ सकैत अछि, मुदा सभ एक संग बैसि निर्णय करत।
जनतब जे एहि बेर मानसून सत्रक दौरान विपक्ष कानून व्यवस्थाक मुद्दा पर नीतीश सरकार पर हमला करैत देखल जाएत। विपक्ष द्वारा सेहो एकर संकेत देल गेल अछि। नेता प्रतिपक्ष तेजस्वी यादव पहिनेसँ अपराधकेँ लऽ कऽ सरकार पर निशाना साधि रहल छथि। विधानसभामे सेहो नीतीश कुमारसँ सवाल पूछबामे कोनो कसरि नहिं छोड़त। एहि बेर विपक्षक नेता सभ मुद्दा पर सरकारसँ जवाब मांगबाक प्रयास करत। एहि बेर सत्र बहुत छोट अछि. मानसून सत्र पांच दिन तक चलत। सरकार एकर जवाब पहिनहिं तैयार कए चुकल अछि। मुदा, एहि बातक कोनो गारंटी नहिं अछि जे सदनक ई कार्यवाही सेहो ठीकसँ चलि सकैत अछि वा नहिं।
