जनक नन्दिनी जानकी केर प्राकट्य स्थली पुनौरा धाममे शुक्रदिन भ’ रहल जानकी मंदिर केर भव्य शिलान्यास समारोहमे मिथिलाक जन-जनकें शामिल होयबाक विद्यापति सेवा संस्थान आह्वान कयलक अछि। बुधदिन संस्थान दिसिसँ जारी विज्ञप्तिमे संस्थानक महासचिव डा बैद्यनाथ चौधरी बैजू कहलनि जे मिथिलावासी भाग्यशाली छथि जे हुनकर जन्म माँ मैथिलीक प्राकट्य स्थली मिथिलामे भेल छनि। माँ जानकी केर जन्म मिथिलामे होयब हमरा लोकनिक सौभाग्य अछि।
ओ कहलनि जे अयोध्यामे मिथिलाक पाहुन राम केर भव्य मंदिर बनला बाद माता सीता केर प्राकट्य भूमि पुनौरा धाममे सेहो भव्य जानकी मंदिर निर्माण कार्यक शुभारंभ होयब मिथिलावासी लेल गौरवक गप्प अछि।
मैथिली अकादमीक पूर्व अध्यक्ष पं कमला कांत झा, माँ जानकीकें मैथिल संस्कृतिक धरोहर बतबैत कहलनि जे जानकी केर प्रति सम्मानक भाव केवल मिथिलाक लोक टामे नहि, अपितु बाहरक लोक केर हृदयमे सेहो धड़कैत अछि। वर्तमान संदर्भमे सेहो हुनक जीवन चरित्र केर व्यापकता समाजक सभ समुदाय लेल अनुकरणीय अछि। ओ कहलनि जे पुनौरा धाममे माता जानकी केर भव्य मंदिर बनलासँ मिथिलाक संस्कृति आ संस्कारकें विस्तार भेटबाक संगहि पर्यटन विकासकें बल भेटत।
कार्यकारी अध्यक्ष डा बुचरू पासवान माता जानकीकें नारी सशक्तिकरणक पहिल सशक्त उदाहरण बतबैत कहलनि जे ई हमरा लोकनि लेल गुमानक गप्प अछि जे करुणा निधानकें सेहो मर्यादा पुरुषोत्तम बनबयवाली सिया मिथिलाक धिया छथि। ई अत्यंत प्रसन्नताक गप्प अछि जे बिना सीताकें मर्यादा पुरुषोत्तम राम केर अपूर्ण होयबाक महिमाकें केंद्र आ राज्य सरकार सेहो स्वीकार कयलक अछि।
सचिव प्रो जीवकांत मिश्र, माँ जानकीकें त्याग आ समर्पणक अनमोल उदाहरण बतबैत कहलनि जे पुनौरा धाममे माता जानकी केर भव्य मंदिर बनने नारी सशक्तिकरणकें बल भेटत।
मणिकांत झा कहलनि जे माँ जानकी मिथिलाक लोकक रग-रगमे बसल छथि। पुनौरा धामक समग्र विकास भेने नम्हर समयसँ विकासक बाट जोहि रहल एहि पावन भूमिमे धार्मिक पर्यटनसँ जुड़ल आधारभूत संरचनाक तेजीसँ विकास संभव होयत।
मीडिया संयोजक प्रवीण कुमार झा, शिलान्यास समरोहमे मिथिलाक सभ जाति वर्गक लोककेँ शामिल होयबाक अपील करैत कहलनि जे ई भव्य ऐतिहासिक आयोजन नहि केवल धार्मिक आस्थाक केंद्र बनत, अपितु मिथिला क्षेत्रकें एकटा वैश्विक धार्मिक पर्यटन स्थलक रूपमे स्थापित होयबाक दिशामे महत्वपूर्ण डेग साबित होयत। ओ बतेलनि जे शिलान्यास समारोहमे शामिल होयबा लेल विद्यापति सेवा संस्थानक तत्वावधानमे लगातार अलग-अलग टुकड़ीमे आमंत्रण अभियान चलाओल जा रहल अछि। जकर नेतृत्व प्रो विजय कांत झा, विनोद कुमार झा, प्रो चंद्रशेखर झा बूढ़ा भाई, दुर्गा नंद झा, डा गणेश कांत झा, डा उदय कांत मिश्र, आशीष चौधरी, पुरूषोत्तम वत्स, नवल किशोर झा, बालेंदु झा, मणिभूषण राजू आदि क’ रहल छथि।
*
एहि लिंकसँ सीधा अखबार निःशुल्क पढ़ि सकैत छी आ पीडीएफ डाउनलोड कय सकैत छी :
https://www.mppdainik.com/e-paper
