अल्पसंख्यक सभकेँ बनाओल जा रहल अछि निशाना : जयशंकर बांग्लादेशक हिंसा पर

नई दिल्ली
*

बांग्लादेशमे हिंसा जारी अछि। शेख हसीना द्वारा प्रधानमंत्रीक पदसँ इस्तीफा देलाक बादो प्रदर्शनकारी सड़क पर उतरि गेल छथि। पड़ोसी देशमे भड़कल हिंसाक विषयमे भारत लगातार चिन्ता व्यक्त कऽ रहल अछि। आब मंगलदिन विदेश मंत्री एस जयशंकर लोकसभा आ राज्यसभामे बांग्लादेशक हिंसाक जानकारी देलनि। ओ कहलनि, “अल्पसंख्यक सभकेँ निशाना बनायल जा रहल अछि।”

विदेश मंत्री कहलनि जे बांग्लादेशमे जुलाईसँ हिंसा चलि रहल अछि। सर्वोच्च न्यायालयक फैसलाक बादो ओतय हिंसा जारी अछि। भारत सरकार बांग्लादेशक अधिकारीसभक सम्पर्कमे अछि। ओतए पुलिस पर सेहो हमला कएल जा रहल अछि। ओ इहो कहलनि जे शेख हसीना भारत अयबाक अनुरोध कयने छलीह। ओ आगू कहलनि जे पड़ोसी देशमे अल्पसंख्यकसभकेँ निशाना बनाओल जा रहल अछि।

बांग्लादेशक स्थिति पर विदेश मंत्री डॉ. एस. जयशंकर कहलनि, “५ अगस्तकेँ कर्फ्यूक बावजूद प्रदर्शनकारी ढाकामे जमा भेलाह। हमर समझ ई अछि जे सुरक्षा प्रतिष्ठानक नेतासभक सङ्ग बैसारक बाद प्रधानमन्त्री शेख हसीना स्पष्ट रूपसँ इस्तीफा देबाक निर्णय लेने छथि। बहुत कम समयमे ओ भारत अयबाक अनुमोदनक अनुरोध कयलनि। संगहि, हमरासभकेँ बांग्लादेशक अधिकारीसँ उड़ान स्वीकृतिक अनुरोध भेटल अछि। ओ काल्हि साँझ दिल्ली पहुँचलीह।

ओ आगू कहलनि, “हम अपन राजनयिक मिशनक माध्यमसँ बांग्लादेशमे भारतीय समुदायक सङ्ग घनिष्ठ आ निरन्तर सम्पर्कमे छी। देशमे अनुमानित १९,००० भारतीय नागरिक रहैत छथि, जाहिमे लगभग ९,००० छात्र छथि। जुलाईमे पैघ संख्यामे छात्र घुरि आयल छलाह। हम अल्पसंख्यकक स्थिति पर नजर राखि रहल छी।”