प्रशांत किशोर किशनगंजमे चुनाव आयोगकें घेरैत कहलनि जे चुनाव आयोगक एसआईआर भाजपाक साजिश अछि। जिनकर नाम मतदाता सूचीसॅं हटाओल जा रहल अछि, हुनका जन सूरजसॅं संपर्क करबाक चाही।
जन सूराजक सूत्रधार प्रशांत किशोर बुधदिन बिहार बदलाव यात्राक तहत जनसभाकेँ संबोधित करय लेल किशनगंज पहुंचलाह। किशनगंजक बहादुरगंजमे जनसभाक बाद पत्रकार सभसॅं बात करैत ओ बिहारमे चलि रहल विशेष मतदाता संशोधन अभियान पर केंद्रीय चुनाव आयोगकेँ घेरलनि। ओ कहलनि जे, चुनाव आयोगक ई अभियान भाजपाक षड़यंत्र अछि।
मुसलमानकेँ संबोधित करैत ओ कहलनि, “जाहि कौमकेँ अपन रहनुमाक समझ नहि होय, ओकरा ऊपर जालिम हुक्मरान केर मुस्सलत कय देल जाइत अछि। ई बात हम नहि, पैगंबर साहब कहने छथि। अपन नबी केर बातकें गौर करु आ अपन बच्चाक शिक्षा-रोजगार आ भविष्यक लेल आगू आऊ।
प्रशांत किशोर एहि अभियानक संबंधमे बिहार आ केंद्र सरकार पर गंभीर सवाल उठेलनि। ओ कहलनि जे एहि मतदाता सूची वोटसॅं मोदी पीएम बनलाह। भाजपा आओर नीतीश कुमारकेँ ई बताबय केर चाही जे हुनकर सरकारक दौरान बिहारक मतदाता सूचीमे नेपाल आओर बांग्लादेशक नागरिकक नाम कोना जोड़ल गेल। नीतीश कुमारकेँ जवाब देबाक चाही जे नेपाल आ बांग्लादेशक लोक बिहारक संसाधन आ सुविधाक कोना फायदा उठा रहल अछि।
प्रशांत किशोर एकटा सवालक जवाबमे राजद पर हमला कयलनि।
ओ सीमावर्ती मिथिला क्षेत्रकेँ ‘सीमांचल’ संबोधित करैत कहलनि जे बिहारमे लालू-राबड़ी सरकार 15 साल आ तेजस्वी यादव 3 साल डिप्टी सीएम रहलाह। ‘सीमांचल’क युवाकेँ शिक्षा आ रोजगारक लेल 18 सालमे की कयलनि ? दरअसल राजद मुसलमानकें अपन लालटेनक मटिया तेल मानैत अछि।
मुसलमान अपन लालटेनमे मटिया तेल जेकाँ जरि रहल अछि। मुस्लिम बच्चाक भविष्य जरैत अछि आ लालू यादवक घर पर इजोत होइत अछि। किशनगंजमे मुसलमानक घरमे अन्हार छै, तोहर बच्चा सब बाहर निकलि कय 10-12 हजार रुपयाक नौकरी लेल छटपटाई छह, मुदा लालू-तेजस्वी अहां सबहक वोट लऽ कऽ अपन घर रोशन कय रहल अछि।
