प्रधानमंत्री नरेन्द्र मोदी लोकसभा चुनावक प्रचार लेल बुधदिन असमक नलबाड़ी पहुँचलाह। एतय रैलीकेँ संबोधित करैत पीएम मोदी कहलनि कि ४ जूनकेँ जे परिणाम होबय जा रहल अछि, ओ स्पष्ट रूपसँ देखबामे आबि रहल अछि। एहि लेल लोक कहैत छथि – ‘४ जून, ४०० केर पार ,एक बेर फेर मोदी सरकार।’
प्रधानमंत्री मोदी कांग्रेस पर हमला करैत कहलनि, “आइ मोदीक गारंटी पूरा देशमे चलि रहल अछि आ पूर्वोत्तर स्वयं मोदीक गारंटीक गवाह अछि। पूर्वोत्तर, जकरा कांग्रेस मात्र समस्या देने छल, भाजपा द्वारा सम्भावनाक स्रोत बनाओल गेल अछि। कांग्रेस अलगाववादकेँ खाद-पानि देलक, मोदी पूर्वोत्तरकेँ गला लगयबाक काज कयलक। मोदी शान्ति आ सुरक्षाक लेल प्रयास कयलक। जे कांग्रेसक ६० सालमे नहिं भ सकल, मोदी २० सालमे कयलक। किएकि हमरा लेल अहांक सपना हमर संकल्प अछि।
पीएम मोदी कहलनि, “२०२४ मे मोदी अहांक बीच एकटा उम्मीद लऽ कऽ आयल छल। २०१९ मे जखन मोदी आयल, एकटा विश्वास लऽ कऽ आ जखनि २०२४ मे जखन मोदी असमक भूमि पर आयल अछि, तखन मोदी गारंटी लऽ कऽ आयल अछि। ‘मोदीक गारंटी’ अर्थात ‘गारंटी पुरा होयबाक गारंटी।’ ओ आगू कहलनि जे कांग्रेस पार्टी राजनीतिक लाभक लेल एहि क्षेत्रसभकेँ अपन पंजामे फँसा कऽ रखने छल। कांग्रेसक पंजा पूर्वोत्तरकेँ जकड़ि लेने छल जाहिसँ हुनका लेल भ्रष्टाचार आ लूटक द्वार खुजल रहल। आब जखन ई पंजा खोलल गेल अछि तखन असममे ‘सबका साथ, सबका विकास’क मंत्र लागू कयल गेल अछि। असम आइ नहिं केवल आन राज्यक संग जुड़ि रहल अछि बल्कि विकासक नव कीर्तिमान सेहो स्थापित कऽ रहल अछि। असममे जतय सड़क नहिं छल, १० सालमे २५०० किलोमीटर राष्ट्रीय राजमार्ग बनल अछि, आइ देशक सबसँ पैघ पुल भूपेन हजारिका सेतु असममे अछि, आइ देशक सबसँ पैघ बोगीबील पुल असममे अछि, आब गुवाहाटीमे असमक अपन एम्स खुलि गेल अछि। असमक पाँच जिलामे कैंसर अस्पताल खोलबाक योजना सेहो तेजीसँ आगू बढ़ि रहल अछि।
