बिहारक आईटी मंत्री कृष्ण कुमार मंटू सभ 10 नवीन आईटी कंपनीक युवा संचालक सभकेँ हुनक कार्यालयक चाभी सौंपलनि। ओ कहलनि जे बिहार आईटी नीति-2024 केर तहत पहिनेसँ निवेशक सभकेँ पूंजीगत निवेश आ रोजगार सृजनक अवसर द’ रहल अछि। बिहारमे उद्यमिता आ नवाचार केर बढ़ावा देबाक खातिर सूचना आ प्रावैधिकी विभाग 2024 मे नवीन आईटी नीति ल’ क’ आएल अछि, जकर असरि आब समस्त बिहारमे देखाइत अछि।
सरकारक नवीन आईटी नीतिसँ राज्यमे चारि हजार करोड़ रुपयेक नवीन निवेशक प्रस्ताव भेटल अछि आ सरकारक एहि पहलसँ राज्यक हजारों युवाकेँ रोजगारसँ जोड़बाक मुहिमकेँ एकटा नवीन रफ्तार सेहो भेटल अछि।
राज्यक सूचना आ प्रावैधिकी मंत्री कृष्ण कुमार मंटू बिस्कोमान भवनमे राज्यक 10 नवीन स्टार्टअप कंपनीकेँ नि:शुल्क ऑफिस स्पेस उपलब्ध करौलथि। एहि अवसर पर आईटी विभागक सचिव अभय कुमार सिंह आ विभागक विशेष सचिव अरविन्द कुमार चौधरी सहित किछु गणमान्य लोक उपस्थित छलथि। ई सभ ऑफिस स्पेस बिस्कोमान टावरक नवम आ 13म मंजिल पर स्थित अछि।एहि नीतिक तहत निवेशक सभकेँ पूंजी निवेश सब्सिडी, ब्याज अनुदान सब्सिडी, लीज रेंटल सब्सिडी, विद्युत बिल सब्सिडी, रोजगार सृजन सब्सिडी जेहेन अनेक लाभ देल जा रहल अछि। ओ कहलथि जे युवाकेँ रोजगार उपलब्ध करायब हुनकर सरकारक प्राथमिकता अछि। एहि लेल हमरा सभकेँ स्टार्ट अप केर बढ़ावा देब जरूरी अछि।
एहि अवसर पर ओ हाइप्रोटेक इंडिया टेक्नोलॉजी प्रा. लिमिटेड, ग्रीन स्टार्क इलेक्ट्रॉनिक्स प्रा. लिमिटेड, फ्लो एपीआइज प्राइवेट लिमिटेड, सेवासिटी टेक्नोलॉजी प्राइवेट लिमिटेड, स्कास टेक्नोलॉजिज प्राइवेट लिमिटेड, ऑस्टोमवर्स इनोवेशन प्राइवेट लिमिटेड, मोमेंटम प्लस ऑनलाइन टेक्नोलॉजी, पॉलीट्रॉपिक सिस्टम प्रा. लिमिटेड, मकासा इंडस्ट्रीज प्रा. लिमिटेड आ एचपीएफ वेंचर इंडिया प्राइवेट लिमिटेड केर युवा उद्यमी सभकेँ दफ्तरक चाबी सौंपलनि।
एहि अवसर पर आईटी विभागक सचिव अभय कुमार सिंह कहलनि जे नव आईटी नीतिक तहत सरकार स्टार्टअप कंपनी सभकेँ छह मासक लेल नि:शुल्क ऑफिस स्पेस उपलब्ध कराबैत अछि। एकर बाद एहि कंपनी सभक कार्यक समीक्षा कय कऽ आवंटन अवधिकेँ आगू छह मासक लेल बढ़ायल जा सकैत अछि।
ओ कहलथि जे एकरा पहिने कुल 13 स्टार्टअप कंपनीकेँ बिस्कोमान टावरमे स्पेस आवंटित कयल जा चुकल अछि। सरकार एहि कंपनी सभक ऑफिस स्पेस संगे-संगे कैबिन, बिजली, एयर कंडीशन, इंटरनेट कनेक्टिविटी, स्वागत क्षेत्र, डेडिकेटेड लिफ्ट, सुरक्षा, हाउस कीपिंग, वाहन पार्किंग आ कैफेटेरिया मुफ्तमे उपलब्ध करावैत अछि। अंतमे विभागक विशेष सचिव अरविन्द कुमार चौधरी धन्यवाद ज्ञापन कयलथि।
