इजरायल कय रहल पैघ आक्रमणक तैयारी, अमेरिका निकालत लेबनानसँ अपन ५० हजार नागरिक
नई दिल्ली
*
इजरायल देशक दक्षिणसँ उत्तर दिस हजारो विशेष बल आ पैराट्रूपर्सक सैन्य टुकड़ी तैनात कयलक अछि। ई सैनिक पहिने कतेको माससँ गाजा पट्टीमे लड़ि रहल छल।
लेबनानमे पेजर विस्फोट आ इजरायली चौकी पर हिजबुल्लाहक हमलाक बाद अमेरिका आब लेबनानसँ लगभग ५०,००० अमेरिकीकेँ साइप्रस निकालबाक योजनापर काज कऽ रहल अछि। अमेरिका आशंका व्यक्त कयलक अछि जे इजरायल लेबनानमे जमीनी युद्ध शुरू करबाक करीब अछि।
अमेरिकी रक्षा मंत्री लॉयड ऑस्टिन अधिकारीसभक सङ्ग एकटा बैसारमे चिन्ता व्यक्त कयलनि जे इजरायल “जल्दिये आक्रमण शुरू कऽ सकैत अछि।” वॉल स्ट्रीट जर्नलक रिपोर्टमे कहल गेल अछि जे इजरायल देशक दक्षिणसँ उत्तर दिसि हजारो विशेष बल आ पैराट्रूपर्सक सैन्य टुकड़ी तैनात कयलक अछि। ई सैनिक पहिने कतेको माससँ गाजा पट्टीमे लड़ि रहल छल।
१७ आ १८ सितंबरकेँ लेबनानमे पेजर आ वॉकी-टॉकी द्वारा कयल गेल विस्फोटमे कतेको लोकक मृत्यु भऽ गेल अछि आ हजारो लोक घायल भेल अछि।
एहि घटनाक बाद लेबनानक राजधानी बेरूतक राफिक हरीरी हवाइ अड्डासँ प्रस्थान करयवला सभटा उड़ानपर पेजर आ वॉकी-टॉकीपर रोक लगा देल गेल अछि।
लेबनानक सरकारी समाचार एजेंसी एनएनए एयरलाइनक हवालासँ कहलक जे यात्रीसभसँ अनुरोध कयल गेल अछि जे ओ पेजर वा वॉकी-टॉकी सन उपकरण नहिं अनथि। जँ हुनका लग एहेन उपकरण पाओल जाइत अछि तँ ओकरा तत्काल जब्त कऽ लेल जायत।
लेबनानमे बीतल दिन जाहि पेजरमे विस्फोट भेल, पेजर बनेनिहार जापानी कंपनी आइकॉम कहलक अछि जे विस्फोट भेल पेजरक मॉडल पिछला दस सालसँ नहिं बनल अछि। मॉडल आईसी-वी८२ केँ २००४ आ २०१४ के बीच मध्य पूर्व देशसभमे निर्यात कयल गेल छल। मुदा २०१४ सँ ओकर निर्यात बन्द भऽ गेल अछि आ उत्पादन सेहो बन्द भऽ गेल अछि। विस्फोटक कारणक विषयमे बात करैत कंपनी कहलक जे हुनका पता नहिं अछि जे विस्फोटक कारण की भऽ सकैत अछि।
