इजरायल आ ईरानक बीच जारी संघर्षमें ईरानकेँ भारी नुकसान पहुँचल अछि। एही संघर्षमे ईरान नहि सिर्फ अपन शीर्ष सैन्य कमांडरकेँ गमेलक बल्कि बहुत रास परमाणु संयंत्र आ महत्वपूर्ण सैन्य अड्डा सेहो नष्ट भऽ गेलै। एम्हर मंगलदिन इजरायली सेना एकटा आर ईरानी शीर्ष कमांडर अली शदमानीकेँ सेहो मारि देलक। इजरायल केर लगातार हमलाक कारण ईरान केर सर्वोच्च नेता आयातल्लाह अली खामेनीकेँ आब असगरे छोड़ी देल गेल अछि।
काल्हि मंगलकेँ इजरायली सेना (आईडीएफ) दावा कयलक कि पांच दिनमे दोसर बेर आईडीएफ ईरान केर युद्धकालीन चीफ ऑफ स्टाफकेँ मारलक। ईरानक सबसँ वरिष्ठ सैन्य अधिकारी आ खामेनी केर सबसँ करीबी सैन्य सलाहकार अली शदमानी मध्य तेहरानमे सही खुफिया जानकारीक आधार पर आईएएफ केर हमलामे मारल गेल। शदमनी ईरान केर सैन्य आपातकालीन कमान केर प्रमुख छलथि। ओ मात्र चारि दिन पहिने ई पद सम्हारने छलाह। हुनका ई जिम्मेदारी इजरायली हमलामे मारल गेल मेजर जनरल गुलाम अली रशीदक जगह पर देल गेल छल । जनतब जे, मेजर जनरल गुलाम अली रशीदकेँ पिछला शुक्र दिन खत्म कऽ देल गेल छल।
ईरानक सर्वोच्च नेता आयातल्लाह अली खामेनी आब पहिलेसँ बेसी असगर नजरि आबि रहल छथि। खुफिया रिपोर्टक अनुसार इजरायली हवाई हमलामे खामेनी केर प्रमुख सैन्य आ सुरक्षा सलाहकारक मृत्यु भऽ गेल अछि,जाहि कारणसँ हुनक आंतरिक सलाहकार टीममे लोकक भारी कमी अछि, जकर असर नेतृत्व पर सेहो देखल जा रहल अछि। एहि लोकक मृत्युक बाद सामरिक गलतीक संभावना बढ़ि गेल अछि।
पिछला शुक्रदिनसँ बहुतो वरिष्ठ सैन्य कमांडरक मौत भऽ गेल अछि। जाहिमे रिवोल्यूशनरी गार्ड (ईरान केर प्रतिष्ठित सैन्य इकाई) केर कमांडर हुसैन सलामी, बैलिस्टिक मिसाइल प्रोग्राम केर प्रमुख आ हवाई क्षेत्र केर प्रमुख अमीर अली हाजीजादेह आ खुफिया प्रमुख मोहम्मद काजमी शामिल अछि। ई सब खामेनी केर लगभग १५-२० लोकक आंतरिक सलाहकार टीमक हिस्सा छल जे समय-समय पर खामेनीसँ महत्वपूर्ण फैसला लेल भेट करैत छल ।
एहि सलाहकार बोर्डमे रिवोल्यूशनरी गार्ड केर वरिष्ठ अधिकारी, धार्मिक नेता आ राजनेता शामिल छल। खामेनी आ ईरानी इस्लामी विचारधाराक प्रति हुनका सभकेँ अटूट निष्ठा छल।
