प्रधानमंत्री नरेन्द्र मोदी रविदिन उत्तर प्रदेशक घोसीमे एकटा चुनावी जनसभाकेँ सम्बोधित कयलनि। चुनावी सभामे पीएम मोदी समाजवादी पार्टी आ इंडिया गठबंधनपर भयंकर निशाना साधलनि।
पीएम मोदी कहलखिन, “सपा हरदम षड्यंत्रक तहत पूर्वांचलकेँ पिछड़ा रखलक। पूर्वांचल एहन लोककेँ बेर-बेर सजा देत। जे एहि क्षेत्रक संग विश्वासघात कयलक, ओ इंडी गठबंधनक ओ लोक जे अहाँक घरमे आगि लगेलक, अहाँक जमीन पर कब्जा कऽ लेलक, जे माफिया लेल नोर बहैलक, एहन लोककेँ पूर्वांचलमे पैर रखबाक अनुमति नहि देल जाय।”
प्रधानमंत्री कहलनि “सपा-कांग्रेसक इंडी गठबंधन सभ जातिकेँ आपसमे लड़ा रहल अछि। ओ चाहैत अछि जे सभ जाति एक दोसरासँ झगड़ा कऽ कमजोर भऽ जाय। हुनका एहिसँ लाभ होयत जे जखन समाजक लोक एकजुट नहिं रहत आ आपसमे लड़ैत नहि तखन अहाँक ध्यान वास्तविक मुद्दासँ हटि जायत।”
प्रधानमंत्री मोदी कहलनि, “चुनावक दौरान ओ (इंडी गठबंधन) मंदिर जाय केर नाटक करैत छथि, मुदा ५०० साल बाद हमर सभ्यता हमर आस्थाक एतेक पैघ क्षण आयल, तखनि ओ राम मंदिरकेँ गारि देबय लागल, ओहिमे दोष खोजय लागल। ई लोकसभ राम मन्दिर निर्माणसँ बहुत नाराज भेल। ई लोकसभ लगातार दबाव बना रहल अछि जे जहिना शाहबानोक फैसला पलटल गेल, तहिना राम मन्दिर पर सर्वोच्च न्यायालयक फैसलाकेँ पलटि देल जाय।”