शनिकेँ देर राति ईरान आ इजरायल केर बीच एक बेर फेर मिसाइल हमला भेल। पिछला तीन दिनसँ दुनू देशक बीच चलि रहल सैन्य झड़प आब गंभीर भऽ रहल अछि। इजरायली रक्षा बल (आईडीएफ) ईरानी सैन्य हथियार फैक्ट्री आ ओकर आसपास रहय वाला नागरिककेँ तुरंत बाहर निकलय केर चेतावनी देलक अछि। आईडीएफ केर प्रवक्ता कर्नल अविचाई अद्री सोशल मीडिया प्लेटफॉर्म एक्स पर एगो पोस्टमे कहलनि, हथियार फैक्ट्री लग रहनाई ईरानी नागरिक लेल खतरनाक भऽ सकैत अछि।
इजरायलक दावा अछि कि ओ तेहरानमे रक्षा मंत्रालयकेँ निशाना बनेलक। एकर अलावा बुशेहर आ तेहरानमे स्थित तेल डिपो आ गैस रिफाइनरी सहित १५० सँ अधिक निशाना पर हमला कयल गेल अछि।
इजरायली हमलामे ईरानकेँ भारी नुकसान भेल अछि। स्थानीय मीडिया रिपोर्टक अनुसार पिछला तीन दिनमे 138 लोकक मृत्यु भऽ चुकल अछि, जाहिमे नौ परमाणु वैज्ञानिक आ 20 सँ बेसी ईरानी सैन्य कमांडर शामिल अछि। संगहि 350 सँ बेसी लोक घायल हेबाक बात कहल जा रहल अछि। हमलाक बाद ईरान तेहरान सहित सात राज्यमे वायु रक्षा प्रणालीकेँ सक्रिय कय देने अछि।
दोसर दिसि ईरान सेहो एकर जवाबी कार्यवाही करैत इजरायल पर 150 सँ अधिक मिसाइल फायर कयलक। एहिमे सँ बहुत रास मिसाइल हाइफा शहर केर बाज़ान ऑयल रिफाइनरी सेंटर पर सेहो लागल, जाहिसँ ओतय भारी नुकसान पहुंचल अछि। ईरानी हमलामे एखन धरि 13 इजरायली नागरिकक मृत्यु भऽ चुकल अछि आ 300 सँ बेसी घायल भऽ चुकल अछि।
ईरानी सरकार कहलक, जँ इजरायल हमलाकेँ रोकैत अछि तँ जवाबी कार्यवाही बंद कय देल जायत। हालांकि इजरायली पक्ष द्वारा एखनि धरि एहि पर कोनो आधिकारिक बयान जारी नहि कएल गेल अछि।
विशेषज्ञक मानब अछि, ई संघर्ष आब सीमित कार्यवाहीसँ आगू बढ़ि एगो पैघ सैन्य संघर्षमे बदलि सकैत अछि। अंतरराष्ट्रीय समुदाय दूनू देशसँ अपील कयलक अछि जे ओ दुनू संयम बरतय आ बातचीतक माध्यमसँ एकर समाधान ताकय।
