भारतमे ईरानक राजदूत इराज इलाही भारतीय लोकसभकेँ ईरान जयबाक लेल आमंत्रित कयलनि आ आश्वासन देलनि जे ईरान यात्राक लेल पूर्ण रूपसँ सुरक्षित अछि। इजरायलक सङ्ग सम्बन्धक विषयमे ओ कहलनि जे हुनकालोकनिक सङ्ग तनाव कोनो नव बात नहिं अछि। भारतक सङ्ग ईरानक सम्बन्धकेँ उत्कृष्ट बताबैत ओ कहलनि जे ओ एतय सम्मानित महसूस करैत छथि।
भारतक संग इरानाक संबंध बहुत पुरान अछि। शुक्रदिन एकटा रोड शो केर दौरान ईरानी राजदूत इराज इलाही भारतीय नागरिकसभसँ ईरान जयबाक आग्रह कयलनि। ओ भारतीय आ अन्य पर्यटकसभकेँ आश्वासन देलनि जे ईरान यात्रा करय आ घुमबाक लेल एकटा सुरक्षित स्थान अछि। ओ इहो आशा व्यक्त कयलनि जे दुनू देशक बीच सीधा उड़ान जल्दीसँ जल्दी शुरू भऽ जायत।
ओ कहलनि जे भारतीय एयरलाइन्स भारत आ ईरानक कतेको शहरक बीच सीधा उड़ान शुरू करत। ओ कहलनि जे वर्तमानमे तेहरान आ दिल्लीक बीच मात्र दूटा सीधा उड़ान अछि, आ एकटा मुम्बईसँ अछि। इलाही पहिने सेहो एहेन बयान देने छलाह।एही साल फरवरीमे इलाही कहलनि जे पश्चिमी देश ईरानक छवि खराब कयलक अछि।
ई पूछला पर कि ईरान आ इजरायलक बीच हालक शत्रुतासँ ईरान आबयवला पर्यटकक संख्या प्रभावित भेल अछि, इलाही कहलनि जे स्थिति नहिं बदलल अछि। ईरानमे भारतीय आ अन्य पर्यटकसभकेँ कोनो सुरक्षा समस्या नहिं अछि।
ओ कहलनि जे इजरायल आ ईरानक बीच तनाव नव नहिं अछि। दुनू देशक बीच बहुत दिनसँ तनाव अछि, तेँ ई कोनो नव बात नहिं अछि, जकर प्रभाव ईरानक स्थितिपर पड़त। हम भारतीय पर्यटक, मित्र सभकेँ आश्वस्त करैत छी आ हुनका सभकेँ ईरान आबय- जाय लेल आमंत्रित करैत छी।
भारत-ईरान सम्बन्धक विषयमे पूछला पर ईरानी राजदूत कहलनि जे भारतक सङ्ग द्विपक्षीय सम्बन्ध मात्र नीक नहिं अपितु शानदार अछि। ओ कहलनि जे भारत तत्कालीन ईरानी राष्ट्रपति सैयद इब्राहिम रईसीक निधनपर एक दिन धरि शोक व्यक्त कयलक जे ईरानक लेल अविश्वसनीय अछि। ओ इहो कहलनि कि ईरानक सर्वोच्च नेता भारतक बहुत सम्मान करैत छथि आ ईरानक राजदूतक रुपमे हमहूँ प्रधानमंत्री मोदी आ भारत सरकारक सम्मान केर निक जँका अनुभव करैत छी।
