ईरानक विदेश मंत्रालयक प्रवक्ता इस्माइल बकाई जी-7 केर नेताक आलोचना कयलनि कि ओ इजरायलकेँ समर्थन कय रहल अछि। मंगलदिन ओ कहलनि, जी-7 केर नेता सभकेँ संयुक्त बयानमे इजरायलक ‘खुला आक्रामकता’केँ अनदेखी कयल गेल अछि, जाहिमे ईरानक ‘शांतिपूर्ण परमाणु संरचना’ पर अवैध हमला, आवासीय क्षेत्रकेँ अंधाधुंध निशाना बनाबय आ ईरानी नागरिकक हत्या शामिल अछि।
कनाडा केर कनानास्किसमे जारी जी-7 शिखर सम्मेलनक बाद जारी बयानमे नेता सभ ईरानक क्षेत्रीय अस्थिरता आ आतंक केर ‘मुख्य स्रोत’ बतैलक। ओ कहलनि कि ईरानकेँ परमाणु हथियार बनाबय केर अनुमति नहि देबाक चाही आ सभ दलकेँ गाजामे युद्धविराम सहित तनाव कम करय केर दिशामे बढ़य केर चाही ।
मुदा इस्माइल बकाई दावा कयलनि कि इजरायल ईरानक खिलाफ बिना कोनो उकसावाकेँ आक्रामक युद्ध शुरू कयलक आ संयुक्त राष्ट्रक चार्टरक अनुच्छेद २(४) केर उल्लंघन करैत ओ परमाणु स्थल पर हमला कयलक, जाहिमे शांतिपूर्ण परमाणु सुविधाक खिलाफ बलक प्रयोग वा धमकी पर रोक अछि।
ईरानी विदेश मंत्रालय केर प्रवक्ता एक्स पर एकटा पोस्टमे लिखलनि कि जी-7 केर सदस्य देश खास कऽ संयुक्त राष्ट्र सुरक्षा परिषद (यूएनएससी) केर तीन स्थायी सदस्यकेँ संयुक्त राष्ट्रक एगो सदस्यक खिलाफ ई आक्रामक कार्यवाहीकेँ अपन कानूनी आ नैतिक जिम्मेदारी लेबाक चाही।
पोस्टमे आगू कहल गेल अछि कि ईरानक खिलाफ इजरायल कोनो युद्ध संयुक्त राष्ट्रक चार्टर आ अंतरराष्ट्रीय कानून लेल नुकसानदेह अछि। ई परमाणु अप्रसार शासन आ गैर-परमाणु राज्यक ऐहन हमलासँ कानूनी सुरक्षा प्रदान करय केर सिद्धांत पर अभूतपूर्व हमला अछि।
बकाई केर अनुसार इजरायलक संग जारी संघर्षमे सैकड़ों निर्दोष लोकक मृत्यु भऽ गेल अछि। ईरानी सार्वजनिक आ सरकारी सुविधा आ लोकक घर तबाह भऽ गेल अछि। अस्पताल आ स्वास्थ्य केंद्रकेँ निशाना बनाओल गेल अछि।
ईरानी विदेश मंत्रालयक प्रवक्ता इस्माइल बकाई कहलनि, संयुक्त राष्ट्र सुरक्षा परिषद आ एकर सदस्य देशकेँ संयुक्त राष्ट्रक उद्देश्यकेँ विफल नहि करबाक चाही।
ओ कहलनि कि यूएनएससीक अपनो प्राथमिक जिम्मेदारी निभाबय केर दौरान तुरंत कार्यवाही करय केर चाही आ आक्रामक इजरायलकेँ अत्याचार करयसँ रोकय केर चाही। इजरायल केर आक्रामकताकेँ रोकनाय आ अंतरराष्ट्रीय कानूनक उल्लंघन लेल ओकर जवाबदेही तुरंत तय करब क्षेत्रीय स्थिरता लेल जरूरी अछि।
बकाई जी-7 देशक संयुक्त बयानकेँ ‘एकतरफा बयानबाजी’ बतैलनि आ कहलनि कि जी-7 केँ अपन बयानकेँ छोड़ि कय वास्तविक तनावक स्रोतकेँ संबोधित करबाक चाही, जे कि ‘इजरायल आक्रामकता’ अछि।
एहीसँ पहिने जी-7 केर नेता इजरायलकेँ सुरक्षाक समर्थन कयलक आ ईरानक संग बढ़ैत तनावक बीच इजरायलकेँ आत्मरक्षाक अधिकारकेँ दोबारा पुष्टि कयलक।
