समेकित बाल विकास परियोजना कार्यालय बेनीपुर चरितार्थ बस राम भरोसे अछि। दिनक साढ़े तीन बजे एक दिसि जतय कार्यालयक लिपिक कक्षमे ताला झुलि रहल छल तऽ दोसर दिसि प्रभारी बाल विकास परियोजना पदाधिकारी केर कार्यालय खुजल तऽ छल मुदा कुर्सी खाली छल।
कार्यालयमें एकटा अंजान व्यक्ति कुर्सी पर बैसिकय मोबाईल चला रहल छल । एहि संबंधमे जखनि प्रभारी बाल विकास परियोजना पदाधिकारी रीता सिन्हासँ मोबाइल पर पूछल गेल तऽ ओ बतेलनि जे मनीगाछीक अलावा बेनीपुर प्रभारमे हम छी। आइ हम मनीगाछी बाल विकास परियोजना कार्यालयमे छी । बेनीपुर कार्यालयक लिपिक विभागीय काजसँ बाहर छथि तें हुनक कक्ष बंद अछि। हमर अनुपस्थितिमे के हमरा कक्षमे बैसल छल, एकर जानकारी लेलाक बादे किछुओ बता सकब।
