हेल्थ एंड वैलनेस सेंटर पर निरीक्षण लेल पहूंचल जांच दलकेँ सेंटर पर ताला लागल भेटल

बेनीपुर समदिया
*

सिविल सर्जनक निर्देश पर सिंहवाड़ा क्षेत्राधीन निस्ता पंचायतक भजौरा हेल्थ एंड वैलनेस सेंटर पर निरीक्षण लेल पहूंचल जांच दलकेँ सेंटर पर ताला लागल भेटल । ओतय कार्यरत सीएचओ बलराम मीणा आ एएनएम पूनम कुमारी अनुपस्थित छलीह । जांच लेल पहुंचल अधिकारीकेँ बताओल गेल जे एतय कार्यरत दोसर एएनएम फुलमनी सोरन छुट्टीमे छथि। जांच टीम धोरदौड़ एपीएचसीक निरीक्षण कयलन्हि जतुका एएनएम रूबी खातून चारि दिनसँ अनुपस्थित पाओल गेलीह। कलिगांव एपीएचसी केर निरीक्षणक दौरान ओतय कार्यरत एएनएम गीता कुमारी सेहो अनुपस्थित छलीह।

मनिकौली हेल्थ एंड वैलनेस सेंटर खुजल छल आ कार्यरत एएनएम वीणा कुमारी आ भवानी कुमारी काज कऽ रहल छलीह । सिविल सर्जन डाॅ० अरुण कुमारक निर्देश पर भऽ रहल छापामारीमे जांच टीमक नेतृत्व प्रभारी चिकित्सा अधिकारी डाॅ० प्रेमचंद कऽ रहल छलाह । प्रभारी बतेलनि जे बिना सूचनाकेँ अनुपस्थित रहयवला सीएचओ आ एएनएम केर खिलाफ कारवाई शुरू कऽ देल गेल अछि ।