केंद्रीय गृह मंत्री अमित शाह तृणमूल कांग्रेस पर जामि कय निशाना साधलनि। ओ ममता सरकार पर राज्यमे भ्रष्टाचार, हिंसा आ घुसपैठ केर बढ़ावा देबाक आरोप लगेलनि। अमित शाह कहलनि जे कतेको वर्ष धरि बंगाल प्रत्येक क्षेत्रमे देशक नेतृत्व कएलक अछि। कतेको साल धरि एतय कम्युनिस्टक राज रहय। ओकरा बाद ममता दीदी एतय आबि एहि भूमिकेँ ‘घुसपैठ, भ्रष्टाचार, अपराध आ हिंदू सभ पर अत्याचारक केंद्र’ बना देलथि।
ओ कहलनि जे वन्दे मातरम् केर रचयिता महापुरुष बंकिम चंद्र चट्टोपाध्याय केर ई धरती सालों धरि देशक मार्गदर्शन कयलक। ज्ञान, धर्म, स्वतंत्रता संग्राम समेत प्रत्येक क्षेत्रमे देशक नेतृत्व कयनिहार बंगालमे कतेक वर्ष तक कम्युनिस्टनक शासन रहल। तकरा बाद “मां, माटी, मानुष” केर नारा दए सत्तामे आबयवाली ममता बनर्जी “महान बंग धरतीकेँ आइ घुसपैठ, भ्रष्टाचार, महिला पर अत्याचार, अपराध, बम धमाका आ हिंदुक संग दुराचारक केंद्र” बना देने छथि।
ओ कहलनि जे बंगालक एहि धरती पर चुनावक दौरान आ तृणमूल कांग्रेस केर चुनाव जीतलाक बाद भाजपाक अनेक कार्यकर्ताक हत्या कयल गेल। सम्पूर्ण देशमे चुनावक दौरान हिंसा खत्म भ’ गेल, मुदा बंगालमे हिंसा जारी अछि।
केंद्रिय गृह मंत्री तृणमूल सुप्रीमोकेँ चुनौती दैत कहलनि, “दीदी, हिंसा कयनिहारकेँ अहाँ कखन धरि बचबैत रहब ? अहाँक समय पूरा भऽ गेल अछि आ 2026 मे पश्चिम बंगालमे भाजपाक सरकार बनय जा रहल अछि। बीतल 10 वर्षमे पश्चिम बंगाल सरकारकेँ जारी कएल गेल 8,27,000 करोड़ रूपया यूपीएक तुलनामे चारि गुना बेसी अछि। हमर फोकस प्रदेशक विकास पर अछि। हमरा विश्वास अछि जे प्रदेशक जनता भारतीय जनता पार्टीकेँ सेवा करबाक अवसर जरूर देत।”
ओ मुख्यमन्त्रीकेँ ललकारैत कहलनि, “हिम्मत होय तऽ बिना हिंसा केर चुनाव करा कय देखू, अहाँक जमानत जब्त भऽ जायत।” ओ ममता बनर्जी पर ‘ऑपरेशन सिंदूर’क विरोध कऽ देशक करोड़ों मातृ-बहिनक संग खिलवाड़ करबाक आरोप लगौलनि आ राज्यक महिलाकें चुनावमे तृणमूल कांग्रेसकेँ सिंदूरक मूल्य समझाबयक अपील कएलनि।
अमित शाह कहलनि कि विकासकेँ बढ़ावा देबय केर अलावे प्रधानमंत्री नरेंद्र मोदी पश्चिम बंगालकेँ समृद्ध सांस्कृतिक विरासत केर संरक्षित करबामे महत्वपूर्ण भूमिका निभा रहल छथि। दशकोंसँ पश्चिम बंगालक लोक बंगालीकेँ शास्त्रीय भाषा केर रूपमे मान्यता दियाबय केर लेल वकालत करैत रहल छथि। हालांकि ममता बनर्जी केंद्र सरकारक समर्थन कयलनि, मुदा ओ बंगालीकेँ लंबा समय तक प्रतिक्षित मान्यता दियाबयमे असफल रहल छथि। मुदा पीएम मोदीक नेतृत्वमे बंगाली भाषाकेँ आखिरकार शास्त्रीय भाषाक प्रतिष्ठित दर्जा देल गेल। ओ ममता सरकार पर हमला करैत कहलनि कि कोलकाताक बाजारमे युवाक नौकरी बिकायत अछि। तृणमूल कांग्रेसक नेता लोकक घरसँ एतबा पैसा पकड़ल जाइत अछि जे गिनैत-गिनैत मशीन थाकि जाइत अछि। आब एहि सिलसिलाकेँ बंद करब जरूरी अछि।
मुर्शिदाबादमे हालमे भेल हिंसा बारेमे केंद्रीय गृह मंत्री कहलनि जे गृह मंत्रालय बार-बार कहलक जे सीमा सुरक्षा बल (बीएसएफ) केँ बजाउ, मुदा पश्चिम बंगाल सरकार नहि बजेलक, कियाकि “जँ बीएसएफ आबैत तँ हिंदूक रक्षा होइत”। फेर भाजपा कार्यकर्ता हाईकोर्ट गेलाह, तखनि बीएसएफ आएल आ हिंदूकेँ बचेलक।
ओ कहलनि कि जाहि हिंदू शरणार्थी सभकेँ नोटिस पठाओल जा रहल अछि, जाहिमे कहल गेल अछि जे हुनक नाम मतदाता सूचीसँ हटाओल जा सकैत अछि। ओ ओहि शरणार्थी सभकेँ भरोसा देलनि जे बस आवेदन भरू आ केन्द्र सरकार सुनिश्चित करत जे हुनका भारतीय नागरिकता देल जायत। ई नागरिकता संशोधन अधिनियममे (सीएए) प्रधानमंत्री मोदीक नेतृत्वमे शरणार्थी सभकेँ वोटक अधिकार देबाक आ भारतीय नागरिकक रूपमे हुनक भविष्यकेँ सुरक्षित करबाक लेल लागू कएल गेल अछि।
