भारतक गैर-बैंकिंग वित्तीय (एनबीएफसी) क्षेत्र आब दुनियामे तेसर स्थान पर पहुँचि गेल अछि। वर्तमानमे अमेरिका आ यूके एनबीएफसी क्षेत्र क्रमशः पहिल आ दोसर स्थान पर अछि। एसबीआई केर एकटा रिपोर्टमे इ जानकारी देल गेल अछि।
एनबीएफसी मात्र लोककेँ ऋण देबाक काज करैत अछि। हुनका लग बैंकिंग लाइसेंस नहिं अछि। एहि कारणेँ ओ जनतासँ जमा स्वीकार नहिं कऽ सकैत अछि। ओ सभ कोनो देशक आर्थिक विकासमे महत्वपूर्ण भूमिका निभाबैत अछि।
बतबैत चली जे वित्त वर्ष २०२३-२४ मे भारतीय अर्थव्यवस्थाक विकास दर ८.२ प्रतिशत रहल अछि जे दुनियामे सबसँ तेज अछि।
वित्तीय क्षेत्रक विकास पर एसबीआई द्वारा जारी रिपोर्टमे कहल गेल अछि जे पछिला दशकमे भारतीय बैंकिंग प्रणालीमे लचीलापन आयल अछि। एहि अवधिमे बैंकिंग प्रणालीकेँ बहुत रास घरेलू आ अंतर्राष्ट्रीय परिस्थितिक सामना करय पड़ल। परिसम्पत्तिक गुणवत्तामे सुधार आ मजबूत अर्थव्यवस्थाक कारणेँ भारतक बैंकिंग प्रणाली नीक स्थितिमे अछि। रिपोर्टमे कहल गेल अछि जे भारत सरकार आ नियामक निकाय एक समान अवसर उत्पन्न कयलक अछि। एहिमे विलयक माध्यमसँ मजबूत बैंक बनाबय, वित्तीय सेवाक पहुंच आ गुणवत्ता बढ़ाबय आ डिजिटल बैंकिंग प्रणाली केर अपनाबै केर प्रोत्साहित केनाइ शामिल छैक ।
महामारीक अवधिमे सेहो सरकार पूँजी आ तरलता बफरक माध्यमसँ वित्तीय क्षेत्रक स्थिरता कायम रखलक।
रिपोर्टमे आगू कहल गेल अछि जे डिजिटल बैंकिंग पर जोर देबाक कारणेँ एहि क्षेत्रक विकास दर बढ़ल अछि। डिजिटल प्लेटफार्मक आगमनक सङ्ग ई वित्तीय सेवा प्रदान करबामे सहायता कयलक अछि।
सरकार आ नियामक डिजिटल परिवर्तनक एहि युगमे ग्राहकक सुरक्षा आ नागरिकक हितक रक्षा पर ध्यान केन्द्रित कयलक अछि।
