भारतक जीडीपी विगत 10 वर्षमे दुगुना भ’ गेल अछि। देशक अर्थव्यवस्था 2025 मे 4.3 ट्रिलियन डॉलर भ’ जाएत एकर अनुमान अछि, जे 2015 मे 2.1 ट्रिलियन डॉलर छल।
अंतरराष्ट्रीय मुद्रा कोष (आईएमएफ) द्वारा जारी कएल गेल डेटामे ई जानकारी देल गेल अछि। अर्थव्यवस्थाक तेज गतिसँ बढ़बाक कारण भारतक जीडीपी 2025 मे जापान आ 2027 मे जर्मनीसँ पैघ भ’ जायत। आईएमएफ केर डेटामे कहल गेल अछि जे भारत दुनियाक सबसँ तेज गतिसँ बढ़निहार अर्थव्यवस्था बनल अछि आ एकर कारण नीतिगत सुधार आ मजबूत आर्थिक वृद्धि अछि।
बीजेपी नेता अमित मालवीय द्वारा सोशल मीडिया प्लेटफॉर्म एक्स पर शेयर कएल गेल पोस्टमे कहल गेल जे विकासक ई गति भारतकेँ एक वैश्विक आर्थिक महाशक्तिक रूपमे स्थापित करैत अछि, जे 2025 धरि जापान आ 2027 धरि जर्मनीकेँ पछाड़ि देत। मालवीय आगू कहलनि जे ई असाधारण उपलब्धि प्रधानमंत्री नरेन्द्र मोदीक नेतृत्व आ हुनक सरकारक अथक प्रयासक प्रमाण अछि। सक्रिय आर्थिक नीतिक, साहसिक संरचनात्मक सुधार आ व्यापारमे सहुलियत पर निरंतर फोकसक संग मोदी सरकार भारतकेँ दुनियाक सबसँ तेजीसँ बढ़ैत प्रमुख अर्थव्यवस्था बना देलनि अछि। संगहि कहल गेल जे ई एकटा एहेन उपलब्धि अछि जे आजादीक बादसँ कोनो पिछला सरकारकेँ प्राप्त नहि भेल।
एही मास’क शुरुवातमे, भारतक विवेकी नीतिक प्रशंसा करैत आईएमएफ’क कार्यकारी बोर्ड कहलक जे देशक मजबूत आर्थिक प्रदर्शन 2047 तक विकसित अर्थव्यवस्था बनबाक लेल आवश्यक सुधारसभकेँ अपनाबयमे मदद कऽ सकैत अछि। आईएमएफ केर कार्यकारी बोर्ड कहलन्हि जे संरचनात्मक सुधार देशमे उच्च-गुणवत्ताक नौकरी पैदा करब आ निवेशक लेल काफी आवश्यक अछि। रिपोर्टमे आगू कहल गेल जे भारतक श्रमिक बाजारकेँ सुधार करबा पर ध्यान केंद्रित करबाक चाही आ महिलासभकेँ श्रमिक बलमे भागीदारी बढ़ेबा पर जोर देबाक चाही।
