प्रधानमंत्री नरेंद्र मोदी अंतरिक्षमे गेल भारतीय वायुसेना समूहक कप्तान शुभांशु शुक्लासँ काल्हि सांझमे बात कयलनि। एहि दौरान पीएम मोदी शुभांशुकेँ बधाई दैत विषय सभ पर चर्चा कयलनि। पीएम मोदी कहलनि जे अंतरिक्षमे भारतक झंडा लहराबय लेल हम अहाँकेँ बधाई दैत छी।
भारतीय वायुसेना समूहक कप्तान शुभंशु शुक्ला अंतरराष्ट्रीय अंतरिक्ष स्टेशन (आईएसएस) पर कदम राखि एकटा नव इतिहास रचलक। ओ नहि केवल भारतक दोसर अंतरिक्ष यात्री बनलथि, बल्कि अंतरिक्ष स्टेशन पर पहुँचयवला पहिल भारतीय सेहो छथि। तीन अन्य अंतरिक्ष यात्री आ ओतय केर स्थायी टीम सेहो हुनका संग एहि ऐतिहासिक मिशनमे शामिल अछि।
एहि गौरवशाली क्षण पर प्रधानमंत्री नरेंद्र मोदीक अंतरिक्षमे रहय वाला शुभांशु शुक्लासँ विशेष बातचीत भेल। एहि दौरान दुनूक बीच कतेको विषय पर संवाद भेल। एहि दौरान पीएम मोदी शुभांशुसँ पूछलनि जे अंतरिक्षक विशालता देखलाक बाद हुनकर दिमागमे पहिल बेर की विचार आयल ? एकर जवाबमे ग्रुप कैप्टन कहलनि कि जखनि हम पहिल बेर कक्षामे पहुँचलहुँ तँ सबसँ पहिल दृश्य पृथ्वी केर छल। एहि दौरान पहिल विचार मोनमे आयल जे पूरा धरती एकटा देखबामे अबैत अछि। कोनो सीमा नहि देखाइत अछि। ओ कहलनि जे दोसर बात जे ध्यान देल गेल ओ ई जे जखनि हम सब अंतरिक्षसँ भारतकेँ देखलहुँ तँ पता चलल जे नक्शा पर अपन देशकेँ जे देखैत छी ओ ओतबहि नहिं अछि। भारत सचमुच बहुत भव्य आ पैघ लगैत अछि। नक्शा पर जे देखैत छी ताहिसँ बहुत बेसी। एतयसँ हमरा लोकनिकेँ लगैत अछि जे कोनो सीमा नहि, कोनो देश नहि। हम सब मानवताक हिस्सा छी, धरती हमर घर अछि आ हम सब ओकर हिस्सा छी।
शुभांशु पीएम मोदीसँ कहलनि जे अहांसँ गप करैत काल हम अपन टांग बान्हि लेलहुं, कियाकि एहि ठाम गुरुत्वाकर्षण शून्य अछि, जँ हम ई काज नहि करब तँ हम उड़ब शुरू कय देब। एतय सुतब एकटा पैघ चुनौती अछि।
