पहलगाम आतंकी हमलाक बाद भारतक निर्णयसँ बिलबिलाएल पाकिस्तान भारतसँ व्यापार खत्म करबाक ऐलान कएलक अछि।पाकिस्तानी प्रधानमंत्री शहबाज शरीफ बृहस्पतिकेँ राष्ट्रीय सुरक्षा समिति (एनएससी) केर बैसार बजौलनि। एहि बैसारमे भारत सरकारक सख्त निर्णय पर करीब दू घंटा धरि चर्चा कएल गेल। बैसारमे पाकिस्तान सरकार भारतक संग व्यापारिक संबंध खत्म करबाक घोषणा कयलक। एकर संगहि भारतीय विमान लेल पाकिस्तान अपन एयरस्पेस बंद कयलक अछि। भारतक सिंधु जल संधिकेँ निलंबित करबा पर पाकिस्तान कहलक जे पानि रोकब युद्ध जेकाँ कार्यवाही अछि।
पाकिस्तानक राष्ट्रीय सुरक्षा समिति (एनएससी) भारतक आरोपकेँ खारिज कए, निराधार आ मनगढ़ंत बतौलक अछि। एनएससी कहि रहल अछि जे पहलगाम हमला पर नई दिल्ली द्वारा पाकिस्तानकेँ निशाना बनेबाक अभियान पूरा तरहसँ झूठ पर आधारित अछि। एहि सिलसिलामे एनएससी इस्लामाबाद स्थित भारतीय उच्चायोगमे तैनात भारतीय रक्षा, नौसेना आ वायुसेनाक सलाहकार सभकेँ निष्कासित करबाक निर्णय कएलक अछि आ हुनका आ हुनकर सहायक कर्मचारीकेँ 30 अप्रैल तक पाकिस्तान छोड़बाक आदेश देल गेल अछि। एकर संगहि निर्णय लेल गेल अछि जे भारतीय उच्चायोगमे राजनयिक कर्मचारीक संख्यां 30 अधिकारी तक सीमित रहत आ ई नियम भारतमे स्थित पाकिस्तान उच्चायोग पर सेहो समान रूपसँ लागू होयत।
एनएससी भारतक सिंधु जल संधि (आईडब्ल्यूटी) केँ एकतरफा रूपसँ निलंबित करबाक निर्णयकेँ कड़ा विरोध कयलक अछि आ ई मुद्दा विश्व बैंक आ अन्य अंतरराष्ट्रीय मंच सभ पर उठेबाक घोषणा कयलक अछि। समिति कहलक अछि जे विश्व बैंक एहि संधिकेँ एक पक्ष अछि, तैं भारतकेँ एहि पर कोनो एकतरफा निर्णय लेबाक अधिकार नहि अछि। एखनहुँ एनएससी भारत द्वारा सीमा बंद करबाक जवाबमे वाघा-अटारी बॉर्डरकेँ बंद करबाक निर्णय सेहो कयलक अछि। समिति पाकिस्तानकेँ सशस्त्र सेनाक तैयारी पर संतोष व्यक्त करैत कहलक अछि जे जँ भारत कोनो दुस्साहस करैत अछि तँ ओकरा सख्त जवाब देल जायत।
पाकिस्तान भारत पर पलटवार करैत देशमे अशांति पसारय केर आरोप लगौलक अछि आ कहलक जे भारतीय जासूस कुलभूषण जाधव पाकिस्तानमे पकड़ल गेल छल। ओ भारतक निर्देश पर आतंकवादी गतिविधिमे भाग लेबाक बात स्वीकार कयने छल।
हालिया निर्णय सभकेँ मोदी सरकारक पाकिस्तान विरोधी एजेंडाक हिस्सा बताओल गेल अछि। पाक प्रधानमंत्री कार्यालयसँ जारी बयानक अनुसार, एनएससीक हालिया बैसारमे जम्मू-कश्मीर केर पहलगाममे पर्यटकक मृत्यु पर दुःख प्रकट कयल गेल अछि। संगहि 23 अप्रैलकेँ भारत द्वारा उठाएल कदम सभकेँ एकतरफा, अन्यायपूर्ण, राजनीतिक रूपसँ प्रेरित, गैर-जिम्मेदाराना आ कानूनी आधारसँ रहित बताओल गेल। तहिना, समिति एक बेर फेर कश्मीरकेँ भारत आ पाकिस्तानक बीच एकटा ‘अनसुलझा अंतरराष्ट्रीय विवाद’ बतौलक अछि।
