भारतीय प्रतिनिधिमंडल वाशिंगटन जाएत, यूएस उत्साहित

नई दिल्ली । समदिया

भारतमे अमेरिकाक राजदूत आ दक्षिण-मध्य एशियाक विशेष दूत सरजियो गोर, यूएस ट्रेड रिप्रेजेंटेटिव (यूएसटीआर)क एंबेसडर जैमिसन ग्रीर संग भेंट कएलनि। एहि भेंटक बाद गोर जानकारी देलनि जे अमेरिका आ भारत व्यापार समझौता पर सहमत भ’ गेल अछि आ अप्रैलक अंतमे भारतक एकटा प्रतिनिधिमंडल वाशिंगटन जाएत।

गोर अपन आधिकारिक एक्स पोस्टमे कहलनि जे ग्रीर संग बैठक फलदायी रहल आ एहिमे राष्ट्रपति डोनाल्ड ट्रंपक दक्षिण आ मध्य एशियामे व्यापार प्राथमिकताकेँ आगू बढ़ेबाक विषय पर चर्चा भेल। ओ कहलनि जे अमेरिका भारतक प्रतिनिधिमंडलक स्वागत लेल उत्सुक अछि।

8 अप्रैलकेँ गोर अमेरिकी राष्ट्रपति डोनाल्ड ट्रंप संग सेहो भेंट कएलनि। ओ सोशल मीडिया पर तस्वीर साझा करैत कहलनि, “राष्ट्रपति ट्रंप संग शानदार डिनर भेल, जतय वैश्विक स्थिरता, भारत-अमेरिका संबंध आ भविष्यक सहयोग पर विस्तृत चर्चा भेल।”

एहिसँ पहिने गोर अमेरिकी वाणिज्य सचिव हावर्ड लटनिक संग सेहो मुलाकात कएलनि। एहि दौरान भारत-अमेरिका व्यापार आ निवेशकेँ मजबूत बनेबाक उपाय पर विचार-विमर्श भेल। गोर कहलनि जे बैठकमे भारतक आर्टिफिशियल इंटेलिजेंस (एआई) क्षमताकेँ अमेरिकी तकनीकी तंत्र संग जोड़बाक लेल नव एमओयू, ‘सेलेक्ट यूएसए’ समिटमे भारतक भागीदारी आ अमेरिकामे भारतीय फार्मा निवेश बढ़ेबाक मुद्दा पर चर्चा भेल।

अमेरिकी वाणिज्य विभाग अपन बयानमे कहलक जे दुनू देश व्यापक व्यापार ढांचाकेँ मजबूत करय पर काज क’ रहल अछि। विभाग कहलक जे 1.4 अरब आबादी वाला भारतीय बाजारक अमेरिकी उत्पाद लेल खोलबाक आ 500 अरब डॉलरसँ अधिक निर्यात बढ़ेबाक दिशामे प्रयास जारी अछि।

गोर दिनक शुरुआतमे अमेरिकी उपराष्ट्रपति जेडी वेंस संग सेहो भेंट कएलनि। ओतहि भारतक विदेश सचिव विक्रम मिस्री सेहो वाशिंगटन पहुंचि दुनू देशक संबंध आ सहयोगकेँ आगू बढ़ेबाक प्रयासमे जुटल छथि।

ज्ञात हो जे 6 फरवरी 2026केँ भारत आ अमेरिका अंतरिम द्विपक्षीय व्यापार समझौताक घोषणा कएने छल। एहि समझौताक तहत भारतमे अमेरिकी औद्योगिक सामान, कृषि उत्पाद, रसायन आ मेडिकल उपकरण पर टैरिफ कम कएल गेल अछि। संगहि भारतकेँ सेहो अमेरिकी बाजारमे निर्यात लेल राहत भेटल अछि।

मार्चमे वाणिज्य मंत्री पीयूष गोयल सेहो डब्ल्यूटीओ बैठकक दौरान एंबेसडर ग्रीर संग भेंट कएने छलाह। फरवरीमे भेल समझौता उच्च-स्तरीय ढांचा छल, आब अप्रैलमे भारतीय प्रतिनिधिमंडल वाशिंगटन जा क’ कानूनी प्रक्रिया, लागू करबाक तरीका आ अगिला चरण तय करत।