आगिलगाओन मिडिया चैनल सभ पर सेहो सेंसर आवश्यक अछि। ई सभ अपन टीआरपी बढ़ाबय लेल कोनो हद तक जा सकैत अछि आ तकर केहनो भयानक परिणाम होए तकर कोनो परवाह एकरा सभकेँ नहिं छैक, बल्कि ताहिसँ एकरा सभकेँ आर आगिमे घी ढ़ारय केर अवसर भेटतै।
जनतब जे भारतीय सेना ओहि अफवाह सभक खंडन कयलक अछि जाहिमे दावा कयल जा रहल छल जे भारत आ पाकिस्तानक बीच सीजफायर खत्म भऽ रहल अछि। भारतीय सेना कहलक अछि जे ई मात्र एकटा अफवाह अछि आ सीजफायर खत्म नहि भऽ रहल अछि।
भारतीय सेना किछु मीडिया हाउसक एहि दावा केर खंडन कयलक अछि जे भारत आ पाकिस्तानक बीच सीजफायर रविकेँ समाप्त भऽ रहल अछि। एकर अतिरिक्त, भारतीय सेना भारत आ पाकिस्तानक बीच कथित डीजीएमओ स्तरक वार्ता पर सेहो स्पष्टीकरण देलक अछि।
भारतीय सेना द्वारा रविकेँ कहल गेल अछि जे किछु मीडिया हाउसमे ई रिपोर्ट चलि रहल अछि जे आइ (रवि) भारत-पाक सीजफायर खत्म भऽ रहल अछि। जखनिकि, एहेन नहि अछि। एहेन खबरि सभ पूर्ण रूपसँ गलत अछि। ओतहि, डायरेक्टर जनरल ऑफ मिलिट्री ऑपरेशंस (डीजीएमओ) स्तरक बातचीत पर सेहो सेना कहलक अछि जे आइ (रवि) कोनो बातचीत निर्धारित नहि कयल गेल अछि।
सेना साफ आ स्पष्ट रूपसँ कहलक अछि जे १२ मई केँ भारत-पाकक डीजीएमओक बीच जे सीजफायरक लेल बातचीत भेल, ताहिमे कोनो समाप्ति तिथि निर्धारित नहि कएल गेल अछि। अर्थात् ई अनिश्चित काल धरि जारी रहत।
जनतब जे 22 अप्रैलकेँ जम्मू-कश्मीर केर पहलगाममे आतंकी हमलाक बाद भारतीय सेना पाकिस्तान आ पीओकेमे ऑपरेशन सिंदूर चला कऽ 9 आतंकी ठिकानाकेँ नष्ट कएलक। एकर बाद पाकिस्तान भारत पर हमला कएलक। सीमासँ सटल शहर सभकेँ लक्षित कऽ ड्रोन आ मिसाइल दागलक। मुदा, भारतीय डिफेंस सिस्टम पाकिस्तानक सभ ड्रोन आ मिसाइलकेँ हवामे नाकाम कय देलक। सेना पाकिस्तानक प्रत्येक नापाक हरकतकेँ मुँहतोड़ जवाब देलक।
