भारतीय सेना प्रमुख जनरल उपेन्द्र द्विवेदी भूटानक आधिकारिक यात्रा पर छथि। बुधदिन ओ भूटानक जमत्शोलिंग स्थित ग्यालसुंग एकेडमी पहुंचलाह। एहि अवसर पर भूटानक सैन्य अधिकारी हुनका राजा पंचमक दूरदर्शी राष्ट्र निर्माण आ युवा सशक्तिकरण योजनाक विस्तृत जानकारी देलनि।
जनरल द्विवेदी भारत आ भूटानक बीच गहींर ऐतिहासिक दोस्तीकेँ दोहरैलनि आ आश्वासन देलनि कि भारतीय सेना एही परिवर्तनकारी पहलमे भूटानकेँ हर संभव सहयोग करत। अकादमी केर प्रयासक प्रशंसा करैत जनरल द्विवेदी कहलनि कि ई संस्था भूटानक युवाकेँ भविष्य गढ़यमे महत्वपूर्ण भूमिका निभाबैत अछी। ओ अकादमी केर आधुनिक बुनियादी ढाँचा आर भविष्यक योजनाकेँ सहो प्रशंसा कयलनि जाहिसँ महामहिम राजाक भव्य दृष्टिकेँ साकार कयल जायत।
एहिसँ पहिने भूटानक महामहिम राजा आ महामहिम रानी जनरल उपेन्द्र द्विवेदीकेँ ताशिचो जोगमे आमंत्रित कयने छलथि। राजाक कार्यालय, कैबिनेट सचिवालय आ कतेको मंत्रालय एतय अछि।
भारतीय सेना प्रमुखकेँ पारंपरिक स्वागत आ गार्ड ऑफ ऑनर देल गेल। अपन चारि दिनक आधिकारिक यात्राक दौरान सेना प्रमुख ताशिचो ज़ोग स्थित राष्ट्रीय स्मारक चोर्टेनमे भूटान केर तेसर राजा महामहिम जिग्मे डोर्जी वांगचुककेँ श्रद्धांजलि देलनि। एहि ठाम एकटा प्रभावशाली गार्ड ऑफ ऑनरक निरीक्षण सेहो कयलनि।
भारतीय सेना प्रमुख एहि ठाम रॉयल भूटान आर्मीक मुख्य संचालन अधिकारी लेफ्टिनेंट जनरल बाटू त्शेरिंगसँ सेहो भेंट कयलथि।
सेना प्रमुख जनरल उपेन्द्र द्विवेदी सोमदिन भूटानक आधिकारिक यात्रा पर विदा भेलाह। सेना प्रमुखक ई यात्रा बहुत महत्वपूर्ण अछि। एही यात्राकेँ भारत आ भूटानक बीच नमहर समयसँ चलयवला भरोसेमंद रक्षा सहयोगकेँ मजबूत करय केर दिशामे एकटा महत्वपूर्ण कदम मानल जा रहल अछि। एही यात्राक उद्देश्य दूनू देशक बीच सैन्य संबंध आर मजबूत करब अछि।
रक्षा मंत्रालयक मानब अछि कि जनरल द्विवेदी केर ई यात्रा भारत आ भूटानक बीच मजबूत सामरिक साझेदारी आ आपसी विश्वासकेँ दर्शाबैत अछि। भारतीय सेनाक अनुसार ई यात्रा भारतक पड़ोसी देश भूटानक प्रति प्रतिबद्धताकेँ दोहराबैत अछि। सेना प्रमुखक एही यात्रासँ दूनू राष्ट्रक बीच पारंपरिक दोस्ती आ सहयोगमे नव ऊर्जा भेटत।
जनतब जे एही साल रॉयल भूटान आर्मी केर मुख्य संचालन अधिकारी लेफ्टिनेंट जनरल बट्टू त्शेरिंग भारत केर आधिकारिक यात्रा पर आयल छलथि। भारत यात्राक दौरान भारत भूटानक रक्षा तैयारीमे मदद करय केर बात कयने छल।
