जदयू सांसद संजय झा’क नेतृत्वमे भारतीय सांसदक एकटा सर्वदलीय प्रतिनिधिमंडल जापानक राजधानी टोक्योमे भारतीय दूतावास (इंडिया हाउस) मे जापानक राजनीतिक, सरकारी आ शैक्षणिक क्षेत्रक लोकसँ भेंट कयलनि। एहि दौरान प्रतिनिधिमंडल सीमा पारसँ आतंकवादक खिलाफ भारत केर ‘जीरो टॉलरेंस’ (शून्य सहिष्णुता) नीति केर बारेमे जानकारी देलनि आ ऑपरेशन सिंदूरक महत्वकेँ उजागर कयलनि।
ई यात्रा भारत केर वैश्विक कूटनीतिक अभियानक हिस्सा अछि, जेकरा पाकिस्तान समर्थित आतंकवादक खिलाफ भारतक रुखक अंतरराष्ट्रीय स्तर पर सामने आनल जा रहल अछि। एहि प्रतिनिधिमंडलमे भाजपा सांसद अपराजिता सारंगी आ बृज लाल, तृणमूल कांग्रेसक अभिषेक बनर्जी, सीपीआई (एम)क राज्यसभा सांसद जॉन बरिटास आ कांग्रेसक वरिष्ठ नेता सलमान खुर्शीद शामिल छलाह। ई सभ सांसद ऑपरेशन सिंदूरकेँ भारत केर ‘न्यू नॉर्मल’ नीतिक प्रतीक बता रहल छथि, जहिमे भारत कोनो तरहक आतंकी हमलाक दृढ़ आ तीव्र जवाब देबाक नीति पर चलि रहल अछि।
टोक्योमे आयोजित एकटा प्रेस कॉन्फ्रेंसक दौरान सांसद जापानी मीडियासँ कहलक कि भारत कोनो तरहक आतंकवादकेँ बर्दाश्त नहिं करत आ राष्ट्रीय हितक मामिलामे सभ दल एकजुट अछि ।
इंडिया हाउसमे आयोजित रात्रिभोजक दौरान भारतीय राजदूत सिबी जॉर्ज आ जापान केर राजनीतिक प्रतिनिधिक संग चर्चा कयल गेल, जाहिमे भारतक एकजुट आ स्पष्ट रुख सामने राखल गेल।
भारतीय संसद सदस्य जापान-भारत संसदीय मैत्री लीगक प्रतिनिधि सभसँ सेहो भेंट कयलनि। एहि बैसारमे लीगक अध्यक्ष यासुतोशी निशिमुरा भारतक संकल्पक समर्थन करैत आतंकवादक खिलाफ दूनू देशक साझा नजरियाकेँ दोहरैलनि ।
प्रतिनिधिमंडल जापानक प्रतिनिधि सभाकेँ अध्यक्ष फुकुशिरो नुकागासँ भेंट कयलनि आ भारतक संग एकजुटता व्यक्त कयालनि। एहि यात्राक माध्यमसँ भारत स्पष्ट कयल गेल कि सीमापार आतंकवादक खिलाफ कोनो तरहक नरमी नै बरतय वाला अछि आ वैश्विक समुदायसँ सेहो एहि तरहक एकजुटताक अपेक्षा करैत अछि।
