भारत आ अमेरिकाक बीच प्रस्तावित द्विपक्षीय व्यापार समझौताक लेल वार्ता मार्च २०२५ मे शुरू कयल गेल छल आ एखनि धरि पाँच दौरक बातचीत भऽ चुकल अछि। ई जनतब मंगलदिन संसदकें देल गेल छल। तहिना प्रस्तावित मुक्त व्यापार समझौता लेल भारत आ यूरोपीय संघ (ईयू) केर बीच एखनि धरि बारह दौरक वार्ता भऽ चुकल अछि। अंतिम दौर 7-11 जुलाईकेँ ब्रसेल्समे भेल छल ।
वाणिज्य आ उद्योग राज्य मंत्री जितिन प्रसाद लोकसभामे लिखित जवाबमे कहलनि, “भारत-अमेरिका द्विपक्षीय व्यापार समझौता पर वार्ता मार्च २०२५ मे शुरू कयल गेल छल। पांच दौरक वार्ता भऽ चुकल अछि, आखिरी दौरक वार्ता १४-१८ जुलाई २०२५ केँ वाशिंगटनमे भेल छल।”
एकटा अलग सवालक जवाबमे मंत्री कहलनि जे पिछला पांच सालमे बौद्धिक संपदा (आईपी) फाइलिंगमे 44 फीसदीक बढ़ोतरी भेल अछि जे 2020-21 मे 4,77,533 छल आ 2024-25 मे 6,89,991 भऽ गेल अछि। सबसॅं बेसी वृद्धि भौगोलिक संकेत (जीआई) मे 380 प्रतिशत केर वृद्धि देखल गेल, ओकर बाद डिजाइन (266 प्रतिशत), पेटेंट (180 प्रतिशत), कॉपीराइट (83 प्रतिशत), ट्रेडमार्क (28 प्रतिशत) आ अर्धचालक इंटीग्रेटेड सर्किट लेआउट-डिजाइन (एसआईसीएलडी) मे 20 प्रतिशतक वृद्धि भेल।
एखनि धरि हस्तशिल्प, कृषि आ खाद्य एहन क्षेत्रमे 697 जीआई रजिस्ट्रेशन जारी भऽ चुकल अछि।
