ठीक ५१ साल पहिने १८ मईकेँ दुनिया भारतक परमाणु क्षमताक प्राप्तिक साक्षी बनल छल। १८ मई, १९७४ केँ ऑपरेशन ‘स्माइलिंग बुद्धा’ भारतकेँ परमाणु शक्तिक श्रेणीमे अनलक। कांग्रेस सांसद आ लोकसभामे प्रतिपक्षक नेता राहुल गाँधी एकटा चित्र साझा करैत ओहि उपलब्धिकेँ नमन कयलनि।
एकटा फेसबुक पोस्टमे राहुल देशक पहिल महिला प्रधानमंत्रीकेँ स्मरण कयलनि आ हुनक अथक प्रयासक प्रशंसा कयलनि। ओ लिखलनि “श्रीमती इन्दिरा गाँधीक दूरदर्शी आ निर्णायक नेतृत्वमे भारत ५१ साल पहिने राजस्थानक पोखरणमे अपन पहिल परमाणु परीक्षण ‘ऑपरेशन स्माइलिंग बुद्धा’ कयलक।”
ओ ओहि नायकसभकेँ स्मरण कयलनि जिनकर क्षमता भारतकेँ दुनियाक छओटा परमाणु संपन्न राष्ट्रक श्रेणीमे शामिल होयबामे सहायता कयलक। ओ आगू लिखलनि “हम प्रतिभाशाली वैज्ञानिक आ शोधकर्तासभक प्रति हार्दिक आभार व्यक्त करैत छी जिनकर समर्पणसँ ई सम्भव भेल। हुनक विरासत आइ धरि जीवित अछि, जे पीढ़ी सभकेँ तकनीकी उन्नति करय आ भारतक सामरिक क्षमता केर मजगुती लेल प्रेरित करैत अछि।”
जनतब, एहि परमाणु परीक्षणकेँ सफल बनेबामे एक दशकसँ बेसी समय लागल छल। देशक प्रसिद्ध वैज्ञानिकक अथक मेहनतिक बल पर दुनिया हमर महत्व बुझने छल। एहिसँ पहिनहि संयुक्त राष्ट्रक सुरक्षा परिषद (यूएनएससी) मे शामिल अमेरिका, रूस, फ्रांस, यूके, चीन परमाणु ताकतिसँ सम्पन्न छल।
भारत एहि परमाणु परीक्षणमे पूर्ण गोपनीयता बरतलक। जहिना दुनियाकेँ पता चलल, शोर मचि गेल। अमेरिका भारतक परमाणु कार्यक्रम पर कतेको प्रकारक प्रतिबंध लगौलक।
सालों बाद भारत पोकरण-2 केर माध्यमसँ फेर अपन उपस्थिति दर्ज कएलक। एकरा ऑपरेशन शक्तिक नाम देल गेल, जे मई 1998 मे भारतक पाँच परमाणु हथियार परीक्षणक एकटा श्रृंखला छल। ई बम राजस्थानमे भारतीय सेनाक पोकरण परीक्षण रेंजमे ब्लास्ट कएल गेल छल।
