भारत नई दिल्लीमे स्थित पाकिस्तानी उच्चायोगमे कार्यरत एकटा अधिकारीक खिलाफ पर्सोना नॉन ग्राटा घोषित कय देलक अछि आ हुनका 24 घंटामे देश छोड़बाक लेल कहल गेल अछि। भारतक ई कार्यवाही पाकिस्तानी अधिकारीक अपन कार्यक्षेत्रक इतर अन्य प्रकारक संदिग्ध गतिविधिमे शामिल होबाक कारण कयल गेल अछि।
पहलगाम हमलाक बादसँ भारत लगातार संदिग्ध पाकिस्तानी अधिकारीकेँ देश छोड़बाक आदेश जारी कय रहल अछि। पाकिस्तान उच्चायोगक प्रभारीकेँ भारत आई एहि संदर्भमे एकटा डिमार्शे (कूटनीतिमे दोसर देशक खिलाफ उठाओल गेल कदम) जारी कएलक आ ओहि अधिकारीकेँ 24 घंटाक भीतर देशसँ बाहर भेजबाक लेल कहल गेल अछि। एहि संदर्भमे काल्हि पाकिस्तान उच्चायोगक कार्यवाहक उच्चायुक्तकेँ एकटा कड़ा आधिकारिक विरोध पत्र जारी कएल गेल।
भारतक तरफसँ स्पष्ट रूपसँ निर्देश देल गेल अछि जे पाकिस्तानक कोनो राजनयिक वा अधिकारी भारतमे अपन विशेषाधिकार आ दर्जा केर कोनो प्रकारसँ दुरुपयोग नहि करथि। जनतब ‘पर्सोना नॉन ग्राटा’ कोनो विदेशी राजनयिककेँ अवांछित घोषित करबाक स्थिति थिक। जकर अंतर्गत ओकरा देश छोड़बाक तुरंत आदेश देल जाइत अछि। एहिसँ पहिने 13 मईकेँ भारत जासूसीमे कथित रूपसँ संलिप्तता केर कारण एकटा पाकिस्तानी अधिकारीकेँ निष्कासित कय देने छल।
जनतब जे २२ अप्रैलकेँ जम्मू-कश्मीरक पहलगाममे पाकिस्तान समर्थित आतंकवादी द्वारा कएल गेल भयावह आतंकवादी घटनामे २६ निर्दोष पर्यटककेँ बेरहमीसँ गोली मारी कय हत्या कय देल गेल छल। एहि जघन्य आतंकी हमलाक ठीक दोसर दिन, २३ अप्रैलकेँ भारत पाकिस्तानक खिलाफ कतेको पैघ कूटनीतिक कदम उठएलक। एही कूटनीति सभक तहत नई दिल्ली स्थित पाकिस्तानी उच्चायोगमे कार्यरत अधिकारीक संख्याकेँ ५५ सँ घटा कय ३० कय देल गेल छल। संगहि भारत इस्लामाबाद स्थित अपन उच्चायोगसँ रक्षा सलाहकार सभकेँ तात्कालिक प्रभावसँ वापस बजा लेलक आ ओहि ठाम कार्यरत राजनयिककेँ संख्यामे सेहो कटौती कय देलक।
