कम लागतक मोबाइल टेलीफोन भारतकेँ डिजिटलीकरणक मार्गपर रखबामे सहायता कयलक अछि। वर्ष २०२२-२३ मे १५ सालसँ बेसी उम्रक ८५ प्रतिशत लोक मोबाइल फोन कनेक्शनक उपयोग कऽ रहल छल। ठीक दू साल पहिने २०२०-२१ मे मोबाइल फोन उपयोगकर्ताक ई आंकड़ा ७०.२ प्रतिशत छल।
ई जानकारी सांख्यिकी आ कार्यक्रम कार्यान्वयन मंत्रालय द्वारा जारी एकटा सर्वेक्षणसँ सामने आयल अछि। भारतमे इंटरनेट उपयोगकर्ताक संख्यामे सेहो दू सालमे काफी सुधार देखल गेल अछि।
सर्वेक्षणमे सामने आयल जानकारीसँ पता चलैत अछि जे २०२०-२१ मे इंटरनेट उपयोगकर्ताक आंकड़ा ४१.८ प्रतिशत छल। संगहि ई २०२२-२३ मे बढ़ि कऽ ५९.८ प्रतिशत भऽ गेल। एहिमे १५-२९ आयु समूहक लोक ८४.२ प्रतिशतसँ बेसी छथि।
सर्वेक्षण क आर जानकारीक अनुसार, “१५ सालसँ बेसी उम्रक ७८.७ प्रतिशत महिला एक्टिव मोबाइल कनेक्शनक उपयोग कऽ रहल छथि। ठीक दू साल पहिने एहि आयु वर्गक मात्र ५६.७ प्रतिशत महिला मोबाइल फोनक उपयोग कय रहल छलीह। संगहि २०२०-२१ मे ८३.२ प्रतिशत पुरुष मोबाइल फोनक उपयोग करबामे सक्षम छलाह। ठीक दू साल बाद, २०२२-२३ मे मोबाइल फोनक उपयोग करयवला पुरुषक ई आंकड़ा ९१.४ प्रतिशत धरि पहुँचि गेल।”
एहि नव सर्वेक्षणक अनुसार, “प्रत्येक ५ मे सँ २ व्यक्ति बैंकिंग लेनदेन करबामे सक्षम छथि। संगहि ४३.४ प्रतिशत लोक अपन मोबाइल फोनक उपयोग ईमेल पठाबय लेल कऽ रहल छथि।”
सर्वेक्षणमे सामने आयल जानकारीक अनुसार, लगभग ९४ प्रतिशत जनसंख्याकेँ अपन निवास स्थानसँ दू किलोमीटरक भीतर बारहमासी सड़क तक पहुँच छल आ शहरी क्षेत्रक ९३.७ प्रतिशत लोक लग ५०० मीटरक भीतर परिवहन सेवा उपलब्ध छल।
स्वच्छता आ पेयजलक उपलब्धतामे दू साल पहिनेक तुलनामे सुधार भेल अछि आ लगभग पूरा भऽ गेल अछि। शहरी क्षेत्रमे जेबसँ बाहरी खर्च घटि कऽ १,४४६ रुपैया आ ग्रामीण क्षेत्रमे ९५० रुपैया रहि गेल, जे स्वास्थ्य सेवा धरि पहुँचमे सेहो सुधारक संकेत दैत अछि।
