चीन आ पाकिस्तानक सीमापर तनावक बीच भारत अपन रक्षाक लेल एकटा पैघ घोषणा कयलक अछि। भारतीय रक्षा बलक अधिकारीसभ कहलनि जे भारतीय सेना कम दूरीक कन्हा पर राखि कऽ चलाबयवला मिसाइल विकसित करबाक दूटा योजनापर काज कऽ रहल अछि। एहि स्वदेशी वायु रक्षा प्रणालीक लागत ६८०० करोड़ टाकासँ बेसी अछि। संगहि, सेनाक योजना ५०० सँ बेसी लाॅन्चर आ लगभग ३००० मिसाइलक विकसित करय आ खरीदबाक योजना अछि। सेना ई प्रक्षेपक आ मिसाइल आत्मनिर्भर भारतक अन्तर्गत देशी रुटसँ कीनत।
रक्षा बलक अधिकारीलोकनि कहलनि जे सेना, अन्य हितधारकसभक सङ्ग पुरान भऽ रहल इग्ला-१एम मिसाइलकेँ बदलबाक लेल नव मिसाइल प्राप्त करबाक प्रक्रिया सेहो शुरू कऽ देलक अछि। मिसाइल खरेदीमे देरीक कारण रूससँ इग्ला मिसाइल किनबाक निर्णय लेल गेल छल। रक्षा मंत्रालय कहलक जे भारतीय सेना आ भारतीय वायु सेनाक लग वर्तमानमे बहुत कम दूरी वला वायु रक्षा प्रणाली मिसाइल, एलआर होमिंग मार्गदर्शन प्रणालीसँ लैस अछि। एहिमे कम दूरीक इग्ला-१एम मिसाइल प्रणाली सेहो अछि। एकरा १९८९ मे शामिल कयल गेल छल आ २०१३ मे एकरा बदलबाक योजना छल।
रक्षा बलक अधिकारी लोकनि कहलनि जे वर्तमानमे ४८०० करोड़ टाकाक परियोजना पर काज कयल जा रहल अछि। ई ठेका हैदराबादक सार्वजनिक क्षेत्रक इकाई आ पुणेक एकटा निजी क्षेत्रक फर्मकेँ देल गेल अछि। एकर अन्तर्गत एहि कम्पनीसभकेँ कम दूरीक मिसाइलक लेल लेजर बीम विकसित करय केर अछि। एकर उपयोग सेना सीमा पर दुश्मन देशक ड्रोन, लड़ाकू विमान आ हेलीकॉप्टरसँ निपटबा लेल करत। एहि परियोजनाक अन्तर्गत सेना आ वायुसेनाक लेल २०० प्रक्षेपक आ १२०० मिसाइल विकसित कयल जेबाक अछि।
